Cano AMEDÎ

Ziman, sembola hebûnê ye

Ziman, remz û nîşana jiyanê ye!

Ziman, stûna hişmendîya netewî ye!

Ziman, di heman deman de hêz û qeweta desthilatdarîyê ye.

Ziman, li dijî dagirkerî û sîstema mêtingehîyê pergala têkoşîn û berxwedanê ye!

Ziman Netew e, Ziman Ax e, Ziman Welat e!

Ziman, kilîda derîyê dîyalog û têgiştinê ye.

Ziman, dînamoya çêkirin û xirabîyê ye. Ziman ji bo nezanan çeka xirabîyê ye; ji bo zaneyan jî bingeha serkeftin û pêşkeftinê ye.

Rojev, di bin bandora mij û dûmanê de dîl bûye. Bêdengî û bê helwestî derî li tifaq û hevkarîyan asê dike. Dagirker û peyayên wan li ser mêrga me, li welatê me hespên xwe dibezînin. Di kûraya asoyê de her diçe, pêlên ba û bahozên nû xuya dibe. Lê mixabîn, xewnên salên rabirdû, nexweşîyên îdolojîk, ego û berjewedîyên kesayetî rê li ber demsala bêaqûbetîyê xweştir dike. Bayê kûr, bayê mirinê ji bakûr ve geş dibe. Bi giranî bandora xewa mirinê girantir dibe.

Pêwist nake em ji hevre gotinên gilover û qirase bibêjin. Pêwist nake em bi “teorîyên” heft reng cîh li hev teng bikin. Em bixwazin an nexwazin, divê em jibîr nekin gava keştî av bigire reşayî dûr û xeyal e. Derya ne qeder e, lê rastîya jiyanê ye.

Divê, em tu car ji bîr nekin bav û bapîrên me bi hezaran gotinên zêrîn gotine, rê nîşandane, şîret û tecrubeyên xwe bi me re parvekirine û weke mîratek dîrokî li pey xwe hiştine. Ev xezîna hanê weke felsefa jiyanê rûpelên nû radixe ber me.

Ez dixwazim bi çend gotinên pêşîyan derd û êşa xwe bi civatê re parve bikim. Hêvî dikim her gotinek di jiyana me de bibe pergala ronahîyê, rêbaza hişmendîya netewî û bingeha hevkarîyek neteweyî…

“Em ji xelkê re dost û yar in

Lê em ji hev re gur û mar in

Em ji xelkê re cîh û war in

Lê em ji hev re erdê sar in

Em ji xelkê re dengbêj in

Lê em ji hev re lal û gej in

Em ji xelkê re hevîr in

Lê em ji hev re kevir in

Em ji xelkê re şîr in

Lê em ji hev re şûr in “

Em ji xelkê re kakil û gûzin

Lê em ji hevre zinar û lat in

Bila dil bi dil be, tûrikê parsê li mil be.

Suwarê hespê xelkê hertim peya ye.

Ji zana bipirse, ji nezana bi tirse!

Roja we xweş û geş be, kedkarên doza netewî… Bi hişmendîya netewî tevbigerin, li ser bingeha berjewedîyên milletê KURD têbikoşin…