Dewaya Qiflnayîşî ya Derheqê PAKî de Dewam Kena

Dewaya Qiflnayîşî ya Derheqê PAKî de Dewam Kena

PAK (Partîya Azadîya Kurdistanî): Na dewaya qefilnayîşî ke semedê name û programê PAKî de ameya akerdiş, hîna dewam kena. Prosedurê yasayî hîna xilas nêbîyo.

A+A-

 

Buroya Çapemenî û Têkilîye ya PAKî:

Ewro (29.07.2020) tay dezgeyanê çapemenî de xeberêk vila bîya ke vajîyeno ‘Mehkemeya Qanûnê Bingehînî ya Tirkîya, dewaya qefilnayîşî ya derheqê PAKî (Partîya Azadîya Kurdistanî) de ameybî akerdiş red kerda’.

Semedo ke na xebere bîya sebebê tay xelet fehmkerdişan, ma wazenê na mesela de tike malûmatan bide raya pêroyî.

Hûmara ewroyî (29.07.2020) ya Rojnameyê Resmî yê Dewleta Tirkîya de, qerarê derheqê PAKî de yo bi nimareyê 2017/3 Esas, 2020/4 ameyo vilakerdene. Gorê nê qerarî bewlîyo ke na dewaya ke semedê tay proseduranê teknîkî derheqê PAKî de ameya akerdene hetê Mehkemeya Qanûnê Bingehînî ra ameya redkerdene. La na dewa dewaya qefilnayîşî ke semedê name û programê PAKî ameybî akerdiş nîya..

Serdozgerîya Mehkemeya Berze (Serdozgerîya Yargitayî), roja 17.05.2017î de îdîanameyêk amade kerd û va ‘PAK wextê xo yê yasayî de Kongreya xo nêviraşto, rayberê partîye nêameyê weçînayîş’. Serdozgerîya Yargitayî bi na îdîa dewaya qefilnayîşî semedê PAKî akerde.

Meclîsa Partîye ya PAKî zî heme belge, dokuman û qerarê muhîmî Mehkemeya Qanûnê Bingehînî rê pêşkêş kerd û îspat kerd ke PAKî prosedurê yasayî yê Kongreya xo û yê weçînayîşê rayberanê xo ardo ca.

Mehkemeya Qanûnê Bingehînî zî nê belgeyê PAKî sehna û resa netîce ke, PAKî prosedurê xo yê yasayî ardo ca û bi zafaneyê rayan (16 vera qefilnayîşî, 1 waştişê qefilnayîşî) dewaya qefilnayîşê PAKî yê seba prosedurê yasayî red kerd. Û no qerar roja 29.07.2020î de Rojnameyê Resmî yê Dewleta Tirkîya de ame dayîş.

PAK (Partîya Azadîya Kurdistanî) sey heme partîyanê yasayî , prosedur û lazimtîyê yasayî ardo ca. PAK hem partîyêka yasayî ya, hem partîyêka meşrû ya. Nê qerarê Mehkemeya Qanûnê Bingehînî zî îspat û tescîl kerdişê na rastî yo.

La çi heyf ke, dewaya qefilnayîşî ya ke Mehkemeya Qanûnê Bingehînî semedê name û programê PAKî akerdbî hîna zî dewam kena.

Seke yeno zanayîş, semedo ke namê PAKî de ‘Kurdistan’ esto; semedo ke PAK programê xo de behsê miletê Kurd û Kurdistanî, behsê heqê perwerdeyê bi ziwanê Kurdî û behsê heqanê miletê Kurd kena, Mehkemeya Qanûnê Bingehînî roja 19.01.2019î de derheqê PAKî de dewaya qefilnayîşî akerdbî PAKî zî Mehkemeya Qanûnê Bingehînî de bi Kurdkî û bi Tirkî paqwitişê xo kerd û namê xo û programê xo pawit; va ma do tu vurnayîşêk name û programêw xo de nêkerê.

Na dewaya qefilnayîşî ke semedê name û programê PAKî de ameya akerdiş, hîna dewam kena. Prosedurê yasayî hîna xilas nêbîyo.

Bi hurmetanê xo, raya pêroyî rê malumat. 29.07.2020

Buroya Çapemenî û Têkilîye ya PAKî

 

Nûçeya berê û ya piştre

NÛÇEYE ŞÎROVE BIKE

BALKÊŞÎ: Şîroveyên ku têde; çêr, heqaret, hevokên biçûkxistinê û êrîşa li ser bawerî, gel û neteweyên din hebin, dê neyêne erêkirin.
JI kerema xwe re şîroveyên xwe jî bi gramera kurdî ya rast û tîpên kurdî binivîsin