Rêveberê ofîsa rizgar kirina revandiyên êzdiyan diyar kir, heta naha ti kes û aliyekî li cîhanê alîkarî nekiriye bo rizgar kirina revandiyên êzdî, tenê bi awayekî berdewam ev 5 salin serok Barzanî û hikûmeta Kurdistanê alîkarî û piştevaniya êzdiyan dikin bo rizgar kirina hemû revandiyan.

Rêveberê ofîsa rizgar kirina revandiyên êzdî Husên Qaîdî ragehand: ‘’Îro 01.08.2019ê dê civîneke çapemeniyê li ser jenosoida Şingal û kar û çalakiyên ofîsê bê pêkanîn. 5 sal ser jenosoida Şingalê de derbaz bûn û hîn kesûkarên me li hin cîhên Iraqê, Sûriyê, Tirkiyê û hejmarek welatên din mae û bi malbatên xwe şad nebûne. Li hember jî wargeha navnetewî û hikûmeta Iraqê heta wê astê xemsar in ku êdî çarenivîsa bi sedan kesan napirsin. Jin, zilam, xwîşk û zarokên me ên ketine dest terorîstên DAIŞê ber bi kîderê ve çûne nayê zanîn. Hîn di kampa Holê û nav malbatên DAIŞê de jî hene, lê em hewldana rizgar kirina berdewam de ne bo hemûyan.’’