Derbarê vê yekê, hevserokê berê yê PYDê Salih Mislim ji Kurdistan24ê re got: Rast e niha Encûmena Sûryeya Demokrat û rêveberiya xwester û TEVDEM banga danûstendinan dikin, lê ev nayê wateya ku her tişt vekirî ye û bê merc e, rast e merc tine ne, lê divê gerentiyek hebe, ku dema rêketin çêbibin, ew rêketin bên bicîkirin.

Li aliyekî din, sikirtêrê Partiya Demoqrat a Kurdî li Sûriyê Nesriddîn Ibrahîm behsa pêwîstiya diyalogê ji bo çarekirina pirsan kir û got: Dema ku diyalog namîne şer destpê dike, di baweriya min de, wê hemû aliyên Sûrî di dawiyê de lihev kom bibin û biriya diyalogê pirsgirêkên xwe çare bikin û divê hemû pêkhateyên Sûrî hevparên rastiyane yên vî welatî bin.

Piştî ku Artêşa Sûryê derbasî bajarê Der`a bû û hejmarek ji bajar û navçeyên wê parêzgehê kontrol kir, hin çavdêr dibînin ku qunaxa operasyonên leşkerî bi dawî bûye û neha dema gotûbêjên siyasî hatiye.