Wezîrê Karên Derve yê Îranê Ebas Eraqçî ragihand ku di êrişên Îsraîlê de xisareke zêde gihiştiye saziyên wan ên atomê.

Şerê Îran û Îsraîlê 13ê Hezîranê bi êrişa Îsraîlê dest pê kir û Serokê Amerîkayê Donald Trump 24ê Hezîranê da zanîn ku agirbestê dest pê kiriye.

Wezîrê Karên Derve yê Îranê Ebas Eraqçî şer û mijara dan û standinên bi Amerîkayê re ji televîzyona fermî ya Îranê re nirxandin.

Ebas Eraqçî got, “Destpêkirina dan û standinên bi Amerîkayê re ne di plana me de ye” û wan û Amerîkayê heta niha ji bo destpêkirina mizakereyan li hev nekiriye.

Eraqçî eşkere kir ku Tehran wê yekê dinirxîne bê ma dan û standinên li gel Amerîkayê di berjewendiya wê da ye yan na.

Heyetên Îran û Amerîkayê li ser mijara bermaneya atomê ya Îranê 5 hevdîtin kirin lê hevdîtin bi destpêkirina şer re rawestiyan.

Wezîrê Karên Derve yê Îranê diyar kir ku di şerê bi Îsraîlê re de ziyanên wan zêde ne û Îranê dest bi nirxandina wan ziyanan kiriye.

Li gorî agahiyên ku wî dane, pisporên enerjiya atomê niha ji bo ziyanên heyî “nirxandineke berfireh” encam didin.

Eraqçî da zanîn ku piştî pesendkirina Parlamento û Meclisa Çavdêriyê êdî rawestandina karên li gel Ajansa Navneteweyî ya Enerjiya Atomê (IAEA) neçarî ye.