Festîvala Fîlman a Navneteweyî ya Cannesê ku wekî "Dilê Sînemaya Cîhanê" tê naskirin, îsal bû şahidê beşdariyeke berçav a sînemaya Kurdî.

Di nav qerebalixa stêrkên Hollywoodê û derhênerên herî navdar ên cîhanê de, derhênera Kurd a ji Hewlêrê Beyan Selahê bi projeya xwe ya nû "Jinwar" bala sînemaya cîhanê kişand ser xwe.

Ev berhema ku hîn di qonaxa amadekirinê de ye, di beşeke taybet û girîng a festîvalê de hat qebûlkirin.

Belgefîlm bû cihê balkêşiya pisporên sînemayê.

Di nav 11 projeyên herî serkeftî yên cîhanê de ye

Yek ji destkeftiyên herî mezin ên Beyan Selahê di gera îsal de, hilbijartina belgefîlmê wê "Jinwar" bû ku di bernameya "Spotlight Projects"ê de cih girt.

Ev beşa ku taybet e ji bo piştgirîkirina fîlmên di asta bilind de, ji seranserê cîhanê tenê 11 projeyan hildibijêre.

Beyan Selahê pirsên Pêşkêşkara Rûdawê Nalîn Hesenê bersivandin û destnîşan kir ku ev yek nîşana kalîte û girîngiya çîroka wê ye.

Ev hilbijartin bûye sedem ku şirketên mezin ên produksiyonê yên ji Brîtanya, Fransa, Holenda û Amerîkayê bikevin pêşbaziyê da ku bibin hevparê vê projeya Kurdî.

Spotlight Projects ew beş e ku ji bo fîlmên di qonaxa post-prodaksiyonê de ye.

Ev beş derfetên mezin ên hevkarî û naskirina navneteweyî pêşkêş dike.

Selah vê yekê wekî "destkefteke gelekî mezin" bi nav dike. Ew dibêje ku ev serkeftin ne tenê ji bo wê ye, ji bo hemû jinên Kurd e.

"Ma ev bi rastî belgefîlm e?"

Tişta ku sînemakarên biyanî li Cannesê herî zêde pê matmayî man, rûyê rastîn û azad ê jinên Kurd bû ku di dîmenên Beyan Selahê de xuya dikir.

Derhêner Beyan Selah behsa serpêhatiyeke balkêş dike û dibêje:

"Gelek derhênerên Ewropî ji min dipirsî ka min lîstikvan bi kar anîne an na.

Ji ber ku li cem wan nêrînek heye ku jinên li Rojhilata Navîn her tim girtî ne û çîroka xwe vedişêrin.

Dema wan dît ku jinên gundê Jinwarê li ber kamerayê çi qas azad, xwebawer û bi vîn in, wan bawer nedikir ku ev jiyaneke rastîn e."

Bi vî rengî, "Jinwar"ê karîbû nêrîna klasîk a cîhanê ya li ser civaka Kurdistanê biguhere.

Ji Hewlêrê heta Rojavayê Kurdistanê

Serpêhatiya çêkirina vê belgefîlmê, bi qasî naveroka wî balkêş e.

Beyan Selaha ku ji Hewlêrê ye û bi zaravayê Soranî mezin bûye, ji bo fêmkirina kûr a çîrokê li Rojavayê Kurdistanê fêrî zaravayê Kurmancî bûye.

Beyan Selah di vê derbarê de dibêje:

"Dema ez çûm Rojavayê Kurdistanê, min tiştek nedizanî, ez tenê bi Soranî diaxivîm. Lê ez zû pê hesiyam ku wan Soranî nedizanî.

Min got, 'Wisa nabe, ez tenê kesek im û divê ez fêrî Kurmancî bibim.' Min xwe fêr kir û ji bo min pir hêsan bû."

Ne tenê ev, Beyanê kameraya fîlm jî bi xwe girtiye.

Beyan dibêje, "Jinên Jinwarê ji min re got: 'Eger tu dixwazî bi rastî me fêm bikî, divê tu bi xwe fêr bibî û dîmenên vî fîlmî bikişînî. Tiştek nîne ku tu bibêjî ez nikarim.'"

Vê xwebaweriyê Beyan kir karaktereke sînemayê ya wêrek ku hem derhêneriyê û hem jî wênesaziya fîlmê xwe bi tenê bike.

Kurd bi şandeyeke berfireh li Cannesê bûn

Beşdariya Beyan Selahê beşek bû ji amadebûneke berfireh a Kurdan a di gera îsal de.

Cara yekem bû ku Kurd bi şandeyeke zêdetirî 50 kesî (şanoger, derhêner û rojnamegeran) û bi standeke taybet a bi navê "Kurdistan" di bazara fîlman a Cannesê de amade bûn.

Ev amadebûn bûye platformek ku sînemakarên Kurd tora têkiliyên xwe bi cîhanê re berfireh bikin.

Beyan Selah bi hêviyeke mezin li paşerojê dinêre û dibêje:

"Dema ez îsal beşdar bûm, dibe ku sala bê gelek jinên Kurd ên din jî beşdar bibin. Ev tiştekî gelekî girîng e."

Çav li sala 2027an e

Tê plankirin ku projeya "Jinwar"ê ya ku niha di qonaxa post-prodaksiyonê de ye, sala 2027an bi dawî bibe.

Beyan Selah dibêje, "Divê berî meha duyem a sala 2027an ev belgefîlm temam bibe."

RUDAW