Dezgeyê sîvîlî ê Amedî, PAK zî mîyan de û tayn partîyê sîyasî seba ke hêrişê Trabzonî şermezar bikê, raywanê ke Hewêler ra ameybî Dîyarbekir ziyaret kerd û bi vilan şîy koma ke Hewlêr ra amey Dîyarbekir ver. 

Tayn STKyê Dîyarbekirî, seba ke hêrişo nijadî o ke koma turîste ya Başûrê Kurdistanî ke şîbî Trabzon rê virazîyabî şermezar bikê û hetkarî bide şarê Başûrê Kurdistanî pê vilan şîy Teyaragehê Dîyarbekirî. Raywanê Herêma Kurdistanî ewro 23.07.2019 de Hewlêr ra amey Dîyarbekir.

Teyarayê Hewlêrî ke seferê Hewlêr-Dîyarbekir keno, saete 4.00 de Hewlêr ra vejîya rayîr û saete 5.00 de resa Dîyarbekir. Roja 23.07.2019 , saete 5.00 de Heyeta Tîcaret û Sanayî (DTSO), heyeta Esnaf û Senetkarê Dîyarbekirî, Borsaya Tîcaretî ya Dîyarbekirî û Beşa Dîyarbekirî ya Yewîya Acentayê Turîstan ya Tirkîya, bi pankartê ‘’Şima Xeyr Ameyê Bajarê Xo-Şehrînîze Hoşgeldiniz’’ şîy meymanê xo ê ke Hewlêr ra amey ver. Serekê DTSOyî Mehmet Kayayî serekîya heyeta dezgeyanê sîvîlan kerd.

Dezgeyê sîvîlî ê Amedî, PAK zî mîyan de û tayn partîyê sîyasî seba ke hêrişê Trabzonî şermezar bikê, koma ke rastê hêrişî ameybî dawetê Dîyarbekir kerd û bi vilan şîy koma ke Hewlêr ra amey ver.  Nameyê PAKî ser o endamê Komîteya Îdarekar yê Merkezî yê PAKî Hanifi Turan û Mehmet Ali Yilmaz şîy Teyaragehê Dîyarbekirî.

Heyeta temsîlkaranê sîvîlan û temsîlkarê PAKî, yew bi yew gule day mêmanê xo ê ke Hewlêr ra ameyê û înan rê va “Şima Xeyr Ameyê”. 

Gama ke mêmanan gulê xo girewtî, mîyan ra tayê xo pers kerd ke, ‘’nê gulî seba çi yê?’’.  Heyete zî mêmanan ra va: Grûba ke Başûrê Kurdistanî ra seba gêrayîşî şîbî Trabzon, uca de, seba ke atqîya înan ser de 'Kurdistan' nusîyabî rastê hêrişê nijadî ameybî. Seba ke ma muameleyo ke înan rê bîyo şemezar bike, ma nê gulan danê şima.

Raywanê ke Hewlêr ra amey, naye ver keyfweşîya xo îzeh kerd.