Serekê DEDEFî Alî Haydar Ben vao ke, semedo ke sîstemê binerdî çin o pêro eşteyê kargehanê Gelîya Munzurî dekewenê Çemê Munzurî û waşt wa cade tedbîrî bêrê girewtene.

Eşteyê kargehan Gelîya Munzurî û Çemê Munzurî de lêşinîye virazenê.  Serekê Federasyonê Komeleyanê Dêrsimî (DEDEF) Alî Haydar Benî derheqê mesele de qisey kerd. 

Benî da zanayene ke 25ê hezîrane de Komeleya Kultur û Xoza ya Dêrsimî seba pawitişê Munzur û Gelîya Pulemurîye waştişname da Îdareyê Taybetî yê Şaristanî. Goreyê Benî 2ê temmuze de înan cewab da waştişname û vat ke mesele resnaye Mudirîya Weşîye yê Şaristanî. 

Benî vat: ''Ma gelîye de virazîyayîşê bînayan reyde têrî yê. Ganî dezgehî uca de tay tedbîrî bigêrê. Ma nêvanê ke wa merdimî uca de pîknîk mekerê, meşorê uca, xoza texrîb bikerê. Wa Gelîyanê Munzur û Pilemurîye de kargehî anêbê, nêxebitê, awa şaristanê ma meherimnê. Ez venga şarê Dêrsimî dana ke ma na babete de hesas bê û nêrazîbîyayîşê xo bîyarê ziwan.''