Goro ke çapemenî de ca girewto Batman û Mêrdîn de tay birayê ma yê Êzdî ke wazenê ageyrê dewanê xo rastê hêrişanê şêlikê a herême û qorîcîyan yenê û yenê asteg kerdene.

Êzdîyê Bakurê Kurdistanî ke her tim binê zulm û zordarîya dewleta dagirkere bî û rastê xeylê fermanan ameyê, nê demê peyênî de, semedê rewşa şerî û binê tedaya dewlete û hetgiranê herêmî  de mecbur mendê ke wareyê baw û kalanê xo caverdî, hêga û bax û baxçe û keyeyanê xo caverdî û koçê Ewropa bikê.

Tay hêz û şêlikê herême ke bi serrano ke hêgayanê Êzdîyan ramenê, mal û bax û baxçeyanê înan ra îstîfade kenê, ewro zî nêverdenê wa Êzdî ageyrê mal û milkê xo ser. Zaf astengîyan vejenê vernîya înan.

Şêlikê dewan û hetgirê rejimî yê herême ke kulturê Kurdî, exlaq û erjanê merdimayî ra dûr ê, dest ronayê mal û milkên Êzdîyan ser, ewro zî qeraranê mehkemeyan zî peygoş kenê.

Saziyê fermî yê a herême zî, semedo ke mabênê Kurdanê misilmanan û Êzdîyan de dişmenetî hîna xorîn bikê, menfietanê ê kesanê ke bi zorî dest ronayê milkanên Êzdîyan ser pawenê û semedê caardişê qeraranê mehkemeyan zî çîyêk nêkenê.

way û birayê ma yê Êzdî ke wazenê egeyrê dewanê xo ewroher wextî ra zêder hetkarîya ma pawenê. Qayîşê ma hetê înan bike.

Ma nê partî û rêxistinê siyasî, ke cêr de nameyê înan estê, hetkarî danê ageyrayîşê way  û birayanê xo yê Êzdî ke qayîlê ageyrê cayanê baw û kalanê xo.

Ma venga pêruna teşkîlatanê merdimayî, dost, rêxistinanên heqanê merdiman, Baro û rîsipîyanê herême, heme partiyê siyasî û temsîlkaranê herême danê ke wa hawara way û birayanê ma yê Kurdanê Êzdiyan bieşnawê. Wa çîyêk bikê ke birîna ma ya verêne xorîn nêbo.

Ma venga heme hêzanê hîstyar û welatperweran danê ke,  wa semedê pawitişê heqanê Êzdîyan û hetkarîya înan, destanê xo yewbînan rê derg bikê û înîsiyatîfêk ronê.

Heqê way û birayanê ma yê Êzdîyan ke perçeyanê netewa Kurdî ya yewêk ê, welatê xo Kurdistan de bi hayayêko asayîşine bicuyê û estbîyayîşê xo yê neteweyî û kulturî  bipawê (biseveknê). Xebata semedê nê armancî, wazîfeyêko neteweyî, însanî û ehlaqî yo.

Ma raya ûmûmî rê zî aşkere kenê ke, heta ke waştişê meşrû yê birayanê ma yê Êzdîyan nêrê ca, ma do têkoşîn bide û teqîpkarê na dewa bê.

Gereke Êzdî bê terse û xof û bi hawayêko azad ageyrê wareyanê baw û kalanê xo.

10 Adar 2021

PDK-Bakur, Pêlkurd, PSK, TEVGER, PAK