Di destpêkê de Serokê Şaxa Batmanê ya PAKê Aziz Özdemir axivî û got:

"Îro 73yemîn salvegera damezrandina Komara Mehabadê ye. Lê hêj wekî ku duh qewimî be zindî ye di hişê miletê Kurd de ye. Mahabad, bi hemû hêjayî û pîrozbûna xwe delala ber dilê her Kurdekî ye. Çi Kurdê ku hay ji vê destkeftî û rûmeta mezin çêbûbe, li ber ezemet û mezinahiya Pêşawa heyran maye. Bûye heyran û dildarê bûka nazenîn Mehabada Kurdistanê. 

Lê bextê Kurdistanê bi hibra reş hatibû nivîsandin li ser rûpelên dîroka bêyom...Bextê felekê careke din rû badabû û gelê Kurd bi qedera xwe re rû bi rû mabûn.

Lê Kurd dîsa ji wê xweliyê vejiyan û ew ala Pêşawa çikandibû dîsa hejandin li banê gerdûnê...Hesret û daxwaza Xanî, piştî sêsed û tiştek salî pêk dihat û kurê Mehabadê Barzanî ew al li asoyê felekê dihejîne...

Sê ezîzên gelê Kurd û sê sembolên pîroz: Mehabad, Pêşawa, Barzanî...  

Mehabad: Bû hêlîna zindîbûn û nûvejînê... bû nîşan û şîara serhildan û serbilindiyê...

Pêşawa: Bû rêberê doza kurdayetiyê û şîarê serxwebûna dîn û welat... 

Barzanî: Bû şîara berxwedan û têkoşînê, îstîqrar û îstiqlalê, bawerî û serxwebûnê...

Em bi hemî hestên xwe yên kurdistanî ji dil û can diqîrin: Hûn her bijîn seydayên hêja, hûn bijîn rêberên mezin, hûn bijîn ezîzên ber dila! Û tu her payidar bî di dilan de ey Mehabada pîroz! Em bi munasebeta salvegera vê bûyera pîroz şehîd û rêberên xwe bi minnet û şukran bibîr tînin û rêzên li ber wan digirin... "

Piştî vê daxuyaniyê Sirûda Neteweyî (EyReqib) hat xwendin. Aziz Özdemîrî daxuyaniya PAKê xwend.

Dûvre, Seydayê Gurdilî (Mele Emeddin)  li ser diroka Komara Kurdistanê (Mahabadê) û Qazî Mihemed axaftineke taybet kir û helbestek xwend.

Dûvre Wesiyeta Qazî Mihemed, ji beşdarvanan re hat belavkirin û ji aliyê Hamdusena ve hat xwendin.

Paşî belgefilmeke bi navê "Komara Kurdistanê Mahabadê" hat temaşekirin.

Bername bi pirs û bersivan berhemdar bi dawî bû.