Serekwerzîro verên Ahmet Davutoglu seba ke partîya newî rono xebate keno. Îdîa beno ke Ahmet Davutoglu partîya xo ya newe do Dîayrbekir de aşkera bikero.

Gorê xebera ajansê Almanan DW Turkçe, Ahmet Davutoglu do Dîyarbekir de şewêka fitarî de partîya xo ya newî bido naskerdene. Yeno vatiş ke Ahmed Davutoglu nika bi xeylê parlementer û şexsîyetan dir seba partîya newe qisey keno. Mîyanê nê şexsan de wezîrê AKP o verên Mehmet Şimşek, Cevdet Yılmaz û Numan Kurtulmuş zî estê. 

Davutoglu wazeno kesê ke Bakurê Kurdistanî de mîyanê AKP de ca gênê la AKP ra aciz ê, înan bianco hetê xo. Vajîyeno ke amblemê partîya newî ya Ahmet Davutogluyî zemînê keskî ser o nefelêka sipî ya 4 pel a. Sek zanîyeno Ahmet Davutoglu mîyanê AKP ra bîyo cîya û keno ke xo rê partîyêka newî rono.

Heto bîn ra zî îdîa beno ke wazîrê ekonomî yo verên Alî Babacan zî semedê partîya newî serekkomaro verên Abdullah Gul dir partîyêka newî nano ro.

Qaso ke vajîyeno partîya Serekkomar Recep Tayîp Erdoganî AKP do hetanî çend aşman perçe bibo û mîyan ra 2 partîyê newî bêrê ronayene.