"32 serrî verê cû roja 16ê Adara 1988î de Helepçeya Başûrê Kurdistanî de rejîmê Seddam Huseyinî bi bombeyanê kîmyewî qasê 5000 kesî qetil kerdî. Zafîya qurbanîyan doman û cinî û kalûpîr bî. 

Demê jenosîdê Helepçe de çi heyf ke heme dewletê herême û ê dinya Erebî, Yewîya Sowyetan, Japonya, Çîn, Dewletê Ewropa û Dewleta Amerîka zî bêdeng mendbî û çimê xo jenosîdî rê pêrcabî.

Jenosîdê Helepçe ser ra 32 vîyartî la şarê Kurdistanî hema zî raştê komkiştiş, qetlîam û kişyayîş, neheqî yeno. 

Tirkîya, Îran, Iraq û Sûrîye, seba ke miletê Kurd, şarê Kurdistanî nêreso heqanê xo, azad nêbo, seba ke cayêk de nêbo wayîrê statuyêka sîyasî, bi plan û stratejîyanê zad hetî, hemkarîya xo domnenê. 

La ne jenosîd û qetlîamê Helepçe û Enfalan, ne zî yê ke wextê peyênî de bîyê, nêşkayê vernîya dewaya azadîya Kurdistanî bigîrê û ewro ra tepîya zî do nêeşkê vernîya azadî û xoserîya Kurdistanî bigîre. 

Gere heme Kurdê dinya semedo ke wa Helepçe sey jenosîdêk bêro qebûlkerdiş, waştiş Netewê Yewbîyayî, Yewîya Ewrûpa û heme dewletanê dinya bikê . 

Ma serrgêra jenosîdê Helepçe ya 32ine de kerdox û destegdaranê nê jenosîdî şermezar kenê.

Ma şehîdanê Helepçe û heme şehîdanê Kurdistanî bi rêz û hurmet yad kenê."

HAK-PAR(Partîya Heq û Azadîyan) 

PAK(Partîya Azadîya Kurdistanî) 

PSK(Partîya Sosyalîst a Kurdistanî)