Engîn Eroglûyo (28) ke Dêrsim de 3 rojîyo xeberêk ci ra nêna girewtene û vînî bîyo, ame îdîakerdene ke berê bagajê otobusêkê mîyan-bajaran ginayo piro û kewto Royê Munzurî mîyan. 

Derheqê Engîn Eroglûyîyo ke qeraxê Munzurî yê Dêrsimî de, roja 15’ê Hezîrane de gama ke heywanê xo çerênayêne reyêk de werte ra bibi vînî îdîayêka balkêşe...

Eroglûyo ke Dêrsim de bayîyêka GSM’yî de karker bi, peynîya hewteyî de şi dewa Yaylagunu ya Pulurî ke heywananê keyeyê xo biçerêno. La Eroglû şan de anêgêra keye, pîya bi dewijan keyeyê Eroglûyî seba vînayîşê lajê xo a mintiqa de gêray û qeraxê Munzurî de telefonê destî, şewqa û şopa gonî dîyî. Bi îhtîmalo ke Eroglû ameyo remnayene cade xebere dîya Cendermeyan. Bi ekîbanê AFAD’î xebata cigêrayîşî ame kerdene la heta nika Eroglû nêameyo vînayîş, la qewimîyayîşêko newe derheqê ey de virazîya.

Raywano ke fotografê menzere yê Munzurî antîbî û otobuse de raywanî kerdêne xebera vînîbîyayîşê Eroglûyî ra dima ferq kerd ke mîyanê fotografanê ey de Eroglû zî esto. 

Raywanî îdîa kerd ke berê bagaja otobusa înan xeripnaye bîyo û her game şofor peya bîyo û reyna padayo. Raywanî va, beno ke berê bagaje akerde mendo û ginayo Eroglûyî ro. Naye ser keyeyê Eroglûyî pîya bi ê dîmenan muracatê dozgerîye kerd. Pîya bi raywano ke dîmenê Eroglûyî ey dir estbî, şoforê otobuse vizêr şan de Stenbol de ameyî tepiştene û neqlê Mudurîya Asayîşê Bajarî bîyî. Ame zanayîş ke şoforî îfadeyê xo de vato ke ey Eroglû qet nêdîyo û do derheqê îdîayan de tu çîyêk nêvajo.