Fermandariya Operasyonên Hevbeş a Iraqê vekişîna hêzên Amerîkayê piştrast kir û ragihand ku ev li gor rêkeftina navbera Bexda û Washingtonê ye.

Berdevkê Fermandariya Operasyonên Hevbeş a Iraqê Tehsîn Xefacî ragihand; vekişîna hêzên Amerîkayê dest pê kir û di qonaxa yekem de 500 serbazên Amerîkayê ji Iraqê derdikevin, ev jî li gor rêkeftina navbera Bexda û Washingtonê bi rê ve diçe.

Tehsîn Xefacî diyar kir ku li gor bernameya ji aliyê Bexda û Washingtonê hatiye danîn, vekişîna hêzên Amerîkayê dê di demeke kin de pêk were.

Berî niha Wezareta Berevaniyê ya Amerîkayê di 17ê Mijdara 2020an de ragihandibû, berî temambûna dema serokatiya Donald Trump, Amerîka dê 2000 serbaz ji Efxanistanê û 500 serbaz ji Iraqê vekişîne.