Wênesazê Kurd Xidir Ebdulkerîm di pêşbirkeke ku 244 hunermend tê de beşdar bûn de hêjayî "Xelata Hunermendên Kêmeneteweyan a Navneteweyî ya 2025an" hat dîtin ku Neteweyên Yekbûyî (NY) piştgiriyê dide wê.

Wênesaz û parêzvanê mafên mirovan Xidir Ebdulkerîmê ku li Almanyayê dijî, bû xwediyê yek ji xelatên bi prestîj ên civaka hunerê ya navneteweyî.

Pêşbirka 4emîn a Hunermendên Kêmeneteweyan a Navneteweyî ku Komîseriya Bilind a Mafên Mirovan a Neteweyên Yekbûyî (OHCHR), bi hevkariya Freemuse, Koma Mafên Kêmeneteweyan (Minority Rights Group) û Kantona Cenevreyê organîze kiribû bi dawî bû.

Di pêşbirka ku ji welatên cuda yên cîhanê 244 hunermend beşdar bûn de xelata mezin dan Xidir Ebdulkerîm.

Merasîma xelatê / Wêne: Xidir Ebdulkerîm

“Ez xelatê diyarî gelê xwe dikim”

Xidir Ebdulkerîmê ku ji bo merasîma xelatê li Cenevreyê ye, ji Rûdawê re axivî û diyar kir ku wî serkeftina xwe diyarî gelê Kurd kiriye.

Hunermend destnîşan kir ku ew hunera xwe wekî amûrekê dibîne da ku mafên gelê xwe biparêze û got:

“Wekî hunermendekî Kurd ê ku bi tabloyên xwe mafên gel û miletê xwe diparêze, wergirtina vê xelata ku bi hevkariya Neteweyên Yekbûyî û saziyên navneteweyî tê dayîn ji bo min şerefeke mezin e.”

Ebdulkerîm diyar kir ku li ser pêşniyara hevalên xwe beşdarî pêşbirkê bûye û baweriya wî xurt bûye ku ew dê di organîzasyona ku beşên wêne, şano, wênegerî û dansê li xwe digire de bi ser bikeve.

Rejîma Esed ew ji hunerê qut kir

Ebdulkerîm sala 1967an li Rojavayê Kurdistanê ji dayîk bûye û rêwîtiya wî ya hunerî dispêre rabirdûyeke dijwar.

Sala 1987an serî li Fakulteya Hunerên Bedew a Şamê da lê hê encam nehatibûn eşkerekirin bi tohmeta "gefa li ser ewlehiya dewletê" ji aliyê rejîma Hafiz Esed a wê demê ve hat girtin.

Mafê wî yê perwerdeyê ji destê wî hat standin û di nav de Zindana Sednayayê ya ku bi navûdengê xerab û Şaxa Filistînê jî, li navendên cuda bi giştî 6 salan girtî ma.

Tabloyeke Xidir Ebdulkerîm /Wêne: Xidir Ebdulkerîm

Di hucreyê de ji sindoqên sebzeyan peyker çêkirin

Hunermend sala 1993yan hat berdan û diyar kir ku wî di salên girtîgehê de jî eleqeya xwe ya ji bo hunerê winda nekiriye û wiha behs kir:

“Dema li girtîgehê bûm min bi amûrên sade yên ku min bi xwe amade kiribûn peyker çêdikirin.

Carinan min darên sindoqên sebzeyan ên ku dihatin dikolan û di wan şert û mercan de jî min hilberîn didomand.”

Tabloyeke Xidir Ebdulkerîm /Wêne: Xidir Ebdulkerîm

Li Almanyayê wekî penaber hunera xwe didomîne

Ebdulkerîm ji Muzeya Reqayê, Metropolîtiya Katolîk a Suryanî û Navenda Lêkolînên Mafên Mirovan a Emanê bawernameyên teqdîrê wergirtine û ji sala 2014an ve li bajarê Potsdamê ya Almanyayê wekî penaber dijî.

Rexnegir xebatên hunermend wekî “ne tenê estetîk, di heman demê de zimanekî xurt ê têkoşîna mafên mirovan û nasnameyê” dinirxînin.

Ebdulkerîm di berhemên xwe de nîşandana welatê xwe û bûyerên rojane yên civaka xwe didomîne.

RÛDAW