Heta niha piraniya gundên Kurdan ên li navçeyên Kurdistanî yên li derveyî îdareya Herêma Kurdistanê, ji ber tunebûna seqamgîriya asayîşê, hatine valakirin.

Serperiştyarê Mîhwera Giwêr-Mexmûr Sîrwan Barzanî ji Kurdistan24ê re ragihand, beşeke mezin a xelkê wan gundan ketine valahiya ewlehiyê li navçeyên madeya 140 û ji ber tunebûna asayîşê, cihên xwe vala kirine.

Sîrwan Barzanî diyar kir, bi destbikarkirina du lîwayên hevbeş, rewşa wan navçetan dê baştir bibe û dikarin asayîş û aramiyê ji bo wan navçeyan dabîn bikin û xelkê wan navçeyan vegerin cih û warê xwe.

Li ser valakirina wan navçeyan, Sîrwan Barzanî eşkere kir, ji ber tunebûna hêzên pêwîst, hikûmeta Iraqê nekariye asayîşê ji bo hemû gundên wan navçeyan dabîn bike û tenê li ser cadeyên sereke, hinek xalên pişkinînê hene, loma ji bo silametiya canê xwe, welatiyên li wan navçeyan, gundên xwe bi cih dihêlin.

Sîrwan Barzanî destnîşan kir, hikûmeta Iraqê soza daye ku di demeke nêzîk de xebatên destbikarkirina du lîwayên hevbeş temam bike û budceya pêwîst ji bo wan dabîn bike.

Basnews