''Ev proje, ji pêvajoya çareserîyê zêdetir, bawerîya ku pêvajoya mijûl kirinê ye xurtir dike''

Serokê Giştî yê Partîya Welatparêzên Kurdistanê (PWK) Mustafa Ozçelîk roja 29.11.2025ê, li paytextê Danîmarkayê Kopenhagê semînerek li dar xist.

Li gel rêvebir û endamên PWKyê yên li Danîmarkayê, nûnerên PDK (Partîya Demokrat ya Kurdistanê), PDK-Îran, HAK-PAR, PDK-Bakur, Komela Şoreşgerê Zahmetkêşanî Kurdistan, Partîya Demokrat a Kurdistan- Sûrîye, Partîya Demokrat a Pêşverû ya Kurd Li Sûrîyê (Partîya Pêşverû), Partîya Demokrata Kurd li Sûrîyê-El Partî, Şepêla Pêşeroja Kurdistana Sûrîye û sîyasetmedar û rewşenbîrên kurd beşdarî semînerê bûn. PSK û Partîya Yekitî ya Kurd Li Sûrîyê (El Wehda) jî mesaj şandin.

Endamê Komîteya Birevebir ya Navendî ya PWKyê Mîrza Akar, di destpêka semînerê de bixêrhatina beşdaran kir, di derbarê armanc û naveroka semînerê de kurte agahdarî da. Paşê, ji bo şehîdên Kuristanê rêz hate girtin.

Piştî rêzgirtinê, Serokê Meclîsa PWK Ewropayê Merd Baran Boskan, di derbarê xebatên li dîasporayê û armanca seredanên Serokê Giştî yê PWKyê yên li Ewropayê de bi zaravayê kurdkî/zazakî kurte axaftinek kir.

Paşê, Mustafa Ozçelîk dest bi semînera xwe kir. Semîner bi moderatorîya endamê Komîteya Birevebir a Navendî ya PWKyê Mîrza Akar ve hate birêvebirin.

Mustafa Ozçelîk, di semînerê de, di derbarê pêvajoya damezrandina PWKyê, doza girtinê ya li ser PWKyê û xebatên PWKyê yên li Kurdistanê de agahdarî da. Herweha Mustafa Ozçelîk di derbarê proje û ‘’pêvajoya nû’’ ya li Bakurê Kurdistanê, rewşa Rojava, Başûr û Rojhilatê Kurdistanê  û sîyaseta PWKyê ya li dîasporayê de bîr û rayên PWKyê anî zimên.

Mustafa Ozçelîk di derbarê “pêvajoya heyî” de got ku ‘’Nuha li pişt derîyan, bi awayekî neşefaf û dizî ku kes nizane çi dibe û dê çi bibe, di navbera Dewleta Tirkîyeyê û Ocalanî de hevdîtin hene. Bêgûman em li gel çekdanîna PKKyê ne; çekdanîna PKKyê di berjewendîyên gelê me yên her çar perçeyên Kurdistanê de ye.  Em li gel in ku “Mafê Hêvîyê” ji Ocalanî re derkeve, Selahattîn Demîrtaş û hemû girtîyên sîyasî bêne azad kirin, kesayetên ku ji ber fikir û xebatên xwe yên sîyasî ceza xwarine bêne berdan; kesên mecbûr mane welatê xwe terk bikin û gerîlayên ku dê çekên xwe deynin bi awayekî azad vegerin welatê xwe. Lê mixabin ne daxuyanîyên Erdogan, Bahçelî û rayedarên Dewleta Tirkîyeyê, ne jî daxuyanîyên Ocalanî tu nîşaneyekê naxe destên me ku em vê pêvajoyê weke “pêvajoya aştî, çareserî, demokrasi û azadîyê” pênase bikin.

Em dibêjin nabe ku qedera 30 milyon kurdên li Bakurê Kurdistanê û Tirkîyeyê di hevdîtinên neşefaf yên di navbera Ocalan û Dewleta Tirkîyeyê de bê hefs kirin. Divê hemû alîyên sîyasî, sivîl û kesayetên qebûlbar ên kurdan wek terefekî bibin mixetabê Dewleta Tirkîyeyê. Pirs, pirsa miletekî ye; ne tenê pirsa rêxistinekê ya jî serokê rêxistinekê ye.

Gotin û kiryarên heta nuha, wê bawerîya ku ev pêvajo, ji pêvajoya çareserîyê zêdetir, pêvajoya mijûl kirinê ye xurtir dike.

Dewleta Tirkîyeyê bi erêkirina dewleta kûr ya Tirkîyeyê, bi erêkirina serokkomarê Tirkîyeyê Erdoganî û bi destê Dewlet Bahçelî bi navê ‘’Tirkîyeyeke bêteror’’ projeyek dayê destpêkirin. Bi ya me, armancek sereke ya vê projeyê ev e ku li Rojavayê Kurdistanê bi alîkarîya Ocalanî, rê li ber bidestxistin û parastina statuyeke siyasî û mafên neteweyî yên gelê Kurd bigre; eger ew nebe jî  van maf û destkeftîyan di asta herî kêm de sînordar bike û herweha şansa berdewamîya serokkomarîya Erdoganî xurtir bike.

Mustafa Ozçelîk, bal kişand ser girîngî û pêwîstîya hevkarî û tifaqa neteweyî û niştimanî ya li Bakurê Kurdistanê û koordinasyona tevgera neteweyî ya di navbera her çar perçeyên Kurdistanê de.

Ji bo vê rewş û pêvajoya ku em li Bakurê Kurdistanê tê de derbas dibin, Mustafa Ozçelîk hem girîngîya tifaqa stratejik ya kurdistanî û hem jî girîngîya hevkarîyeke berfireh ya li ser daxwazên acîl ên miletê Kurd anî zimên.

Mustafa Ozçelîk bang li hemû kadroyên kurdistanî, azadîxwaz û demokrat kir da ku ji bo avakirina partîyeke milî, demokratî û girseyî li Bakurê Kurdistanê, piştgirîyê bidin siyaset û kultura nû ya PWKyê.

Mustafa Ozçelîk careke din, piştgirîya PWKyê  ji bo bername û şanda hevbeş ya ku di konferansa bi beşdarîya hemû alîyên kurdî yên Rojavayê Kurdistanê ku di 26ê Nîsana 2025ê ya li Qamişloyê de hatibû dîyar kirin anî zimên. Mustafa Ozçelîk got ku ‘’Îro divê hemû kurdên cîhanê piştgirîya gele me yê Rojavayê Kurdistanê bikin da ku gelê me bikaribe statuyeke milî, coğrafik, sîyasî bidest bixe’’.

Mustafa Ozçelîk destkeftina federe ya li Başûrê Kurdistanê weke destkeftina hemû kurdên cîhanê pênase kir û bal kişand ser girîngî û pêwîstîya avakirina hikûmeteke hevbeş ya ku bikaribe hêza peşmerge, aborî, ewlekarî û dîplomasîya Beşûrê Kurdistanê bike yek.

Mustafa Ozçelîk diyar kir ku dikare firsendên dîrokî bêne ber derîyê xuşk û birayên me yên Rojhilatê Kurdistanê jî û ji bo gelê me bikaribe ji wan firsendan feydê werbigre, berîya her tiştî divê hevahengî û yekrêzîya nav mala kurd bê ava kirin.

Di beşa dudan ya semînerê de, beşdarên seminerê pirsên xwe kirin, bîr û rayên xwe anîn zîmên û Mustafa Ozçelîk jî bersîva pirsên wan da.

Buroya Ragehandinê ya Parrtîya Welatparêzên Kurdistanê (PWK)