Çar parçeyanê Kurdîstanî de, Rojhelatê Mîyanênî û çar kinarê dinya de, emser zî ma mîyanê yew rewşa wina de yê ke, tede şer, merg, pêrodayîş, rijnayîş, neheqî, bêedaletîye û binpaykerdişê heq û azadîyanê mîllî û însanîyan dewam keno, roşanêko newe yê Remezanî û Newrozî pêşwazî kenê.

Ma hêvî kenê ke Roşanê Remezanî û Newroz; Vakurê Kurdîstanî de awankerdişê hemkarî û îttîfaqanê neteweyî û demokratîkan rê, destvistişê heq û azadîyanê mîllî û demokratîkan rê û azadîya welatê ma rê bibê destpêk.

Ma hêvî kenê ke Roşanê Remezanî û Newroz; Rojhelatê Kurdîstanî de rijnayîşê Rejîmê Îranî rê, bi îttîfaqê mîllî û demokratîkî yê partîyanê Kurdîstanîyan zî, Rojhelatê Kurdîstanî de statuyêkê mîllî, cografî, sîyasî û azadîye rê bibê destpêk.

Ma hêvî kenê ke Roşanê Remezanî û Newroz; Başûrê Kurdîstanî de serê esasê pawitiş, averberdişê destkewteyanê nîkayînan (esteyan) û destvistişê destkewteyanê neweyan de; seba viraştişê yew îdareyê hemparî pêkerdişê mabênê pêro partîyanê sîyasîyan rê, temînkerdişê îttîfaqêkê neweyî yê stratejîk, mîllî û Kurdîstanî rê û caardişê Madeya 140. rê bibê destpêk.

Ma wazenê ke Roşanê Remezanî û Newroz; Başûrê Rojawanê Kurdîstanî de, çarçeweyê programa sîyasî ya hempare ya ke konferansê 26ê Nîsana 2025î yê Qamişlo de ameye eşkarekerdene de, bi heyetê hemparî yê tesbîtkerdeyî reyde, pîya dormeleyê programêkê mîllîyî de mîyanê yewîye de rîbirî-amayîşê pêro hetanê Kurdan ê bi Îdareyê Şamî reyde rê û destvistişê statuyêkê sîyasî û heq û azadîyanê mîllî, demokratîkan rê bibê destpêk.

Ma wazenê ke Roşanê Remezanî û Newroz; Rojhelatê Mîyanênî û seranserê dinya de bibê destpêkê yew prosesêkê neweyî ke tede şer, pêrodayîş û rijnayîşî biqedîyê û ercê azadîye, demokrasîye, edaletî, têduştîye, heqê mîllî û însanîyî û hişê  pawitişê tebîetî gan bivînê.

Pa pêro dej, qehir û xemgînîyanê ma yê ke ma cuyayê û nika cuyenê zî, bi bawerî û hêvîyanê xo yê seba ameyoxêkê azadî, ma Roşanê Remezanî û Newrozê pêro misilmananê Kurdîstanî û yê seranserê dinya pîroz kenê.

20.03.2026

Mustafa Ozçelîk

Serekê Pêroyî yê Partîya Welatparêzanê Kurdîstanî (PWK)