Endamekî şanda Hikûmeta Herêma Kurdistanê ya ku ji bo çereserkirina pirsgirêka henardekirina nefta Kurdistanê çûbû Bexdayê, ragihand ku şandeya Hikûmeta Herêma Kurdistanê û kompaniyên neftê îro li Bexdayê, bi şandeya Wezareta Neftê ya Iraqê re civînekê pêk anîne.

Endamê şandeya Hikûmeta Herêma Kurdistanê Omêd Sebah li ser rûpela xwe ya medyaya civakî ragihand ku şandeya Kurd û berpirsên kompaniyên neftê, bi Wezîrê Neftê yê Iraqê Hayyan Ebdulxanî û hin payebilindên wezaretê re civiyane.

Omêd Sebah da zanîn ku di civînê de, mijarên bi pirsgirêk ên di navbera Hikûmeta Herêma Kurdistanê û Hikûmeta Iraqê û Wezareta Samanên Sirûştî ya Herêma Kurdistan û Wezareta Neftê ya Iraqê yên wek; xercên kompaniyên neftê,  henardekirinak nefta Herêma Kurdistanê û lêçûna kompaniyên neftê, hatine gotûbêjkirin.

Duh, bi vexwendina Wezareta Neftê ya Iraqê, şandeyeke Hikûmeta Herêma Kurdistanê û şandeya ku ji berpirsên kompaniyên neftê yên ku li Herêma Kurdistanê karê hilberîna neftê dikin pêk tê, gihîştibûn paytexta Iraq Bexdayê.

Endamê şandeya Hikûmeta Herêma Kurdistanê Omîd Sebah her wiha ragihand ku armanca serdana şandeya Hikûmeta Herêma Kurdistanê û kompaniyên neftê ya Bexdayê ya pêkanîna civîna li gel Wezareta Neftê ya Iraqê ew e ku ji bo sazkirina mekanîzmayeke ku danûstandinên di navbera Hikûmeta Herêma Kurdistanê û Hikûmeta Iraqê bidomin û di mijara henardekirina neftê de gihîştina biryareke hevbeş e.