Berpirsê Ofîsa Rêveberiya Xweser ê Şamê Ebid Kerîm Omer ragihand ku heta niha ji bo pêkanîna Peymana 10ê Adarê ti pêngavên pratîkî nehatine avêtin.

Omer desthilata nû ya Sûriyeyê bi "derengxistin û astengkirinê" tohmetbar kir.

Berpirsê Ofîsa Rêveberiya Xweser ê Şamê li ser rewşa dawî ya dan û standinên bi hikûmeta navendî re ji Rûdawê re axivî.

Ebid Kerîm Omer diyar kir ku Rêveberiya Xweser ji bo pêkanîna hemû xalên Peymana 10ê Adarê amade ye.

Omer got: "Em bi awayekî zelal amadebûna xwe ya tam teqez dikin. Em pabendî hemû xalên Peymana 10ê Adarê û lihevkirinan in."

"Lihevkirin tenê teorîk man"

Omer bal kişand ser wê yekê ku hevdîtin tenê di çarçoveya "nêrînên erênî" de mane.

Serkirdeyê Rêveberiya Xweser destnîşan kir ku heta niha ti dan û standinên cidî li ser mekanîzmayên pêkanîna Peymana 10ê Adarê nehatine kirin.

Omer li ser hevdîtinan her wiha got,"Tiştê ku heta niha hatine kirin, rêzehevdîtinên erênî bûn.

Ev hevdîtin tenê di çarçoveya lihevkirinên teorîk de man."

Peymana Mezlûm Ebdî û Ehmed Şer

Ebid Kerîm Omer bi bîr anî ku 7ê Çiriya Pêşîn lihevkirinên girîng hatibûn kirin.

Ev lihevkirin di navbera Fermandarê Giştî yê Hêzên Sûriyeya Demokratîk (HSD) Mezlûm Ebdî û Serokkomarê Sûriyeyê Ehmed Şer de pêk hatibûn.

Berpirsê Ofîsa Rêveberiya Xweser ê Şamê naveroka lihevkirinan eşkere kir.

 Omer da zanîn ku lihevkirin li ser mekanîzmayên tevlîbûna HSD û Hêzên Ewlekariya Navxweyî (Asayîş) ya nav saziyên parastin û navxwe bûn.

"Berpirsyarî dikeve ser milê Şamê"

Berpirsê Rêveberiya Xweser hikûmeta Şamê rexne kir û got,"Heta îro ji bo pêngavên pratîkî ti gav nehatine avêtin.

Em dibînin ku berpirsyarî bi awayekî eşkere dikeve ser milê desthilata veguhêz.

Ev desthilat bêyî sedemên zelal demê dirêj dike û astengiyan derdixe."

Ebid Kerîm Omer diyar kir ku ew li benda destnîşankirina dem û nexşerêya xebatê ne da ku komîteyên pispor karibin dest bi karê xwe bikin.

Omer her hişyarî da û got, "Berdewamiya derengxistina civînan derfetên bipêşketinê asteng dike.

Em li gel diyalogê û çareseriyê ne. Erênîbûn pêwîst e lê divê veguhere gavên berbiçav, ji ber ku pêwîstiya Sûriyeyê bi kiryaran heye, ne bi sozên paşxistî."