Kampanyaya ‘Sêşema Na ji Cezayê Darvekirinê re’ ji aliyê girtiyên siyasî yên li 38 girtîgehên Rojhilatê û Îranê ve hatiye destpêkirin. Kampanyayê di hefteya 79an de, daxuyaniyek belav kir.

Li gorî daxuyaniyê di hefteya borî de 20 kes li girtîgehên Rojhilatê û Îranê hatine darvekirin.

Hezar û 477 kes hatin darvekirin

Kampanyaya ‘Sêşema Na ji Cezayê Darvekirinê re’ragihand ku di dema salek ya serokkomariya Mesûd Pizîşkiyan de, hejmara kesên hatine darvekirin gihişt hezar û 477 kes.

Di heman daxuyaniyê de hate gotin ku hefteya borî bi fermana berpirsê girtîgeha Qizilhesar ya li bajarê Kerec ya Îranê û cîgirên wî yên bi navê Hesen Qubadî û Îsmaîl Ferec Nejad, zêdetirî 100 pasewanên çekdar yên girtîgehê û hêzên îstîxbaratê, avêtine ser hola girtiyên siyasî û çar girtiyan avêtine hûcreyên take kesî.

Kampanyaya ‘Sêşema Na ji Cezayê Darvekirinê re’ di dewama daxuyaniya xwe de got; “Hefteya borî cezayê darvekirinê li girtiyê siyasî Yequb Direxşan bi tometa ‘propagandaya dijî dewletê’ hatiye birîn. Dijî biryarê girtiyên li girtîgehên Qerçek û Tahrana Mezin nerazîbûn nîşandane û bê navber dirûşme avêtin. Serokê Dadweriya Îranê Hisên Muhsînî di daxuyaniyek çapemeniyê bi awayek eşkere ragihand ku ewê welatiyan bêdeng bikin.”

Kampanyayê da zanîn ku di dema şerê 12 rojan yê di navbera Îsraîl û Îranê de, zêdetirî 2 hezar kes hatine desteserkirin.

Herî dawî Kampanyaya ‘Sêşema Na ji Cezayê Darvekirinê re’ bang li azadîxwazan, çalakvanan, xizmên girtiyên siyasî, rêxistinên navnetewî û her kesê kir ku dijî darvekirinan dengê xwe bilind bikin.