Şaredariya Bajarê Mezin a Amedê, Konservatuwara Aram Tîgran a ku di dema qeyûm de hatibû girtin, piştî 9 salan ji nû ve ji bo hunerhezan vedike.

Şaredariya Bajarê Mezin a Amedê, dê Konservatuwara Aram Tîgran a ku ji aliyê qeyûm ve hatibû girtin, piştî 9 salan çalak bike û pêşkêşî hunerhezan bike.

Kesên ku dixwazin li konservatuwarê perwerdeyê bibînin, dikarin di navbera 1ê Îlonê û 15ê Çiriya Pêşîn de serlêdanê bikin.

Serokatiya Daîreya Çand û Karên Civakî ya Şaredariya Bajarê Mezin, dê Konservatuvara Aram Tîgran a ku sala 2010an hatibû avakirin lê 1ê Çiriya Paşîn a 2016an ji aliyê qeyûm ve hatibû girtin, piştî 9 salan ji nû ve çalak bike û pêşkêşî muzîk û hunerhezan bike.

Di konservatuwarê de dê beşên şano, muzîk, muzîka zarokan, wêje, resîm û sînemayê hebin û zimanê perwerdeyê dê Kurdî be.

Serlêdan, dê di navbera 1ê Îlonê û 15ê Çiriya Pêşîn de li Navenda Çandê ya Sezaî Karakoçê bên kirin û welatiyên li derveyî parêzgehê jî dikarin bi rêya hejmara telefonê ya 0412 502 90 18 serlêdanê bikin.

Temênên serlêdanê û demên bernameya waneyan wiha ne:

Şano: Temênên serlêdanê 20-30 sal, bernameya dersê 2 sal

 Muzîk: Temênên serlêdanê 17-25 sal, bernameya dersê 4 sal

 Muzîka Zarokan: Temenê serlêdanê 7-12 sal, bernameya dersê 6 sal

Wêje: Temenê serlêdanê 18-32 sal, bernameya dersê 2 sal

Resîm: Temenê serlêdanê 17-30 sal, bernameya dersê 2 sal

 Sînema: Temenê serlêdanê 18-30 sal û bernameya dersê 2 sal

Dema eşkerekirina encaman

Kesên ku nirxandina hunerî derbas bikin û bi Kurdî nizanibin, dê salekê tenê perwerdeya Kurdî bibînin.

Bernameya dersan dê heftane be, bernameya salane dê 40 hefteyan bidome.

Atolyeyên hilbijartina xwendekaran dê di navbera 13-19ê Çiriya Pêşîn de bên lidarxistin û encam dê 20ê Çiriya Pêşîn bên eşkerekirin.

Destpêkirina perwerdeyê

Perwerdehiyên Konservatuwara Aram Tîgran, dê ji bo Beşa Muzîka Zarokan 25ê Çiriya Pêşîn û ji bo beşên şano, muzîk, wêje, resîm û sînemayê jî 27ê Çiriya Pêşîn dest pê bikin.

Tahîr Baykuşakê Gerînendeyê Giştî yê Konservatuwara Aram Tîgran ji Rûdawê re da zanîn ku perwerde dê bi Kurdî be.

Tahîr Baykuşak her wiha ragihand ku dê bi Kurmanciya Jor (Kurmancî), Kurmanciya Jêr (Soranî) û bi Kirmanckî (Zazakî-Dimilî) perwerde were dayîn.

Rûdaw