Serekkomarê Komara Kurdîstanî Pêşewa Qazî Mihemed û embazê ey, 79 serrî verê cû, roja 31.03.1947î de hetê Dewleta Îranî ra bajarê Mehabadî yê Rojhelatê Kurdîstanî de, Meydanê Çarçira de ameyî îdamkerdene.

Komara Kurdîstanî, roja 22.01.1946î de bajarê Mehabadî yê Rojhelatê Kurdîstanî de, Meydanê Çarçira de hetê Serekkomar Qazî Mihemedî ra amebî îlan kerdene.

Labelê çi heyf ke, Komara Kurdîstanî roja 17.12.1946î de, hetê Dewleta Îranî ra ameye rijnayene.

Dima rijnayîşê Komara Kurdîstanî, Serekkomar Qazî Mihemed û embazê ey hetê Dewleta Îranî ra ameyî tepiştene û muhakemekerdene.

Pêşewa Qazî Mihemedî, Dadgeha (Mehkemeya) Dewleta Îranî ya îşxalkere de dewaya Kurdîstanî bi rûmetî pawite.

Dadgeha Dewleta Îranî ya ke pîvananê huqûqî ra dûr a, qerarê îdamî da Qazî Mihemed û embazanê ey ro; no qerar roja 31.03.1947î de ame caardene.

Cuyayîş, tewir (vindertiş), şexsîyet, wesîyet û nameyê pawitişî yê mehkeme yê Pêşewa Qazî Mihemedî, raştîya xo de metod û hişmendîya Kurdîstanî pêşkêşê ma kenê.

Wesîyet û nameyê pawitişî yê Pêşewa Qazî Mihemedî ewro zî wezîfeyanê ma yê neteweyî û tarîxîyan nîşanê ma danê.

Komara Kurdîstanî, tarîxê Kurdîstanî de tecrubeyêko pîl o ke pêro Kurdîstanijî ci pê şanaz ê (serberz ê).

Serekkomarê Komara Kurdîstanî Qazî Mihemedî, Alaya Kurdîstanî teslîmê rayberê neteweyî yê Kurd û yew ji fermandaranê leşkerîyan ê Komara Kurdîstanî, General Mela Mistefa Barzanî kerdbî.

Roja ke Alaya Kurdîstanî teslîmê Mela Mistefa Barzanî bîye, a roje ra nat na alaye her tim bi destê kedkar û xoverdayoxanê mucadeleyê azadîya Kurdîstanî, her çar parçeyanê Kurdîstanî de hewa vîyartîya (lipeyîyaya). Nika a alaye Parlamentoyê Herêma Federe ya Başûrê Kurdîstanî ser o lipeyîyena.

Ewro torinê Qazî Mihemedî û mîrasgirê mucadeleyê ey, Rojhelatê Kurdîstanî de sey 6 partîyan, bi "Îttîfaqa Partîyanê Sîyasîyan ê Kurdîstana Îranî" kom bîyê. Ma paştî danê nê îttîfaqî û hêvî kenê ke no îttîfaq hîna hîra bibo û biweçerîyo destkewteyêkî ke, şarê ma yê Rojhelatê Kurdîstanî heqê tayînkerdişê qederê xo û heqê bi dest vistişê statuyêkê sîyasî yê welatê xo bi dest bivisno. Ma bi pêro estbîyayîş û hêzê xo danê zanayene ke ma hetê way û birayanê xo yê Rojhelatê Kurdîstanî de yê.

Bi mucadeleyê şarê ma yê Rojhelatê Kurdîstanî rojêk reyna Mehabad de, Meydanê Çarçira de, xoverdayoxê azadîye do mizgînîya îlankerdişê Komara Kurdîstanî bidê Pêşewa Qazî Mihemed û pêro şehîdanê Kurdîstanî.

Serrgêraya 79. ya îdamkerdişê înan de, ma Pêşewa Qazî Mihemed, embazanê ey û pêro şehîdanê Kurdîstanî bi hurmet yad kenê.

Şarê Kurdîstanî qet do Pêşewa Qazî Mihemed û şehîdanê Kurdîstanî xo vîr a nêkero.

Vindertişê Pêşewa Qazî Mihemedî yo bi rûmet û nesîhetê ey ewro zî mucadeleyê azadîya Kurdîstanî de rayîrê ma kenê roşn.

Ma serrgêraya 79. ya dardekerdişê (îdamkerdişê) înan de Pêşewa Qazî Mihemed, embazanê ey û pêro şehîdanê Kurdîstanî bi hurmet yad kenê.

31.03.2026
Buroya Çapemenîye ya Partîya Welatparêzanê Kurdîstanî (PWK)