Buroya Ragehandinê ya Partîya Welatparêzên Kurdistanê (PWK):

Em 8000 şehîdên Enfala Barzanîyan bi rêzdarî bi bîr tînin

Di roja 31ê tîrmeha 1983yan de li dijî Barzanîyan Enfal hate li dar xistin.

8 Hezar mêrên Barzanîyan ku temenê wan ji 7 salî heta 85 salî bûn, ji alîyê rejîma Seddam, ji herêma Barzanê hatin derxistin û anîn herêma Qûştepe ku bi ser wîlayeta Hewlêrê ve ye û li kampên Qûdus û Qadisîyê heps kirin. Mêrên Barzanîyan bi rojan bê av û bê nan di nav van kampan de hiştin, di dawîya ezîyeteka mezin de hatin wendakirin. Çi bi serê van mirovan de hat, heta îro jî nayê zanîn.

Di ser vê jenosîdê de 42 sal derbas bû ye, lê hîn jî tu xeber ji piranîya van 8 hezar kesan tuneye. Ev mirov hatin îmhakirin û bi tevayî hatin binaxkirin. Cenazeyên kêm kesan ji wan vê dawîyê hatine dîtin.

Em di 42yemîn salvegera Enfala 8000 Barzanîyan de, şehîdên Enfala Barzanîyan û hemû şehîdên Kurdistanê bi rêzdarî bi bîr tînin. Hemû qesas û berpirsên Enfala Barzanîyan careke din rûreş dikin.

Em dibêjin, bersîva herî mezin û bibandor a li dijî Enfala Barzanîyan ewe ku, hemû alîyên Başûrê Kurdistanê hikûmeteke hevbeş ava bikin, tifaqa xwe ya neteweyî, niştimanî pêk bînin, û hemû kurdên cîhanê li destkeftîyên federe yên Herêma Kurdistanê xwedî derkevin, biparêzin, pêşde bivin.

31.07.2025

Buroya Ragehandinê ya Partîya Welatparêzên Kurdistanê (PWK)