Nûnerê Taybet ê Serokê Amerîkayê Tom Barrack li Şamê bi Serokkomarê Sûriyeyê Ehmed Şer re civiya û ragihand ku Serok Trump razî bûye ku cezayên li ser Sûriyeyê bên rakirin lê hişyarî li ser rewşa Helebê da.

Tom Barrack li ser navê Serokê Amerîkayê Donald Trump û Wezîrê Karên Derve Marco Rubio li Şamê bi Serokkomarê Sûriyeyê Ehmed Şer û Wezîrê Karên Derve Eshed Şeybanî re hevdîtinek pêk anî.

Di hevdîtinê de bûyerên dawî yên li Helebê û pêvajoya veguhastina dîrokî ya Sûriyeyê hatin gotûbêjkirin.

Barrack di daxuyaniya xwe de diyar kir ku Trump vê gavê wekî "derfeteke girîng" dibîne ji bo Sûriyeyeke nû ya yekgirtî ku tê de hemû pêkhate (Ereb, Kurd, Durzî, Xirîstiyan, Elewî, Tirkmen, Asûrî û yên din) bi rêz û hurmet bên dermankirin û beşdariya wan a di saziyên ewlehî û birêvebiriyê de were misogerkirin.

Cezayên li ser Sûriyeyê tên rakirin

Tom Barrack diyar kir ku cezayên li ser Sûriyeyê tên rakirin û got:

"Ji bo naskirina vê derfetê, wî (Trump) qebûl kir ku cezayan rake da ku 'şansekê bide Sûriyeyê' ji bo bi pêş ve biçe.

Hikûmeta Amerîkayê piştgiriyê dide veguhastina dîrokî ya Sûriyeyê û piştgiriyê dide hikûmeta Sûriyeyê ya di bin serokatiya Ehmed Şer de."

Rola HSDyê û Peymana Adara 2025an

Barack di daxuyaniyê de bal kişand ser rola Hêzên Sûriyeya Demokratîk (HSD) û qurbanîdana wan a li dijî DAIŞê.

Barrack destnîşan kir ku hikûmeta Sûriyeyê pabendbûna xwe ya bi peymana entegrasyonê ya Adara 2025an a bi HSDyê re ducare kiriye û wiha pê de çû:

"Ev peyman çarçoveyekê peyda dike ji bo tevlîkirina hêzên HSDyê di nav saziyên niştimanî de, bi awayekî ku mafên Kurdan biparêze û yekîtî û serweriya Sûriyeyê xurt bike."

Hişyariya li ser Helebê: Tavilê şer rawestînin

Nûnerê Amerîkayê diyar kir ku bûyerên dawî yên li Helebê şertên vê peymanê dixin xetereyê û ew ji vê rewşê "gelekî bi fikar in."

Tom Barrack bangî hemû aliyan kir û got:

"Em bangî hemû aliyan dikin ku herî zêde xwe bigirin, tavilê şer rawestînin û li gorî peymanên 10ê Adarê û 1ê Nîsana 2025an ên di navbera hikûmeta Sûriyeyê û HSDyê de vegerin diyalogê.

Tundî destkeftiyên ku piştî ketina rejîma Beşar Esad hatine bidestxistin dixe metirsiyê."

Tîma Rubio amade ye navbeynkariyê bike

Di dawiya daxuyaniyê de hat diyarkirin ku tîma Wezîrê Karên Derve Marco Rubio amade ye ku di navbera hikûmeta Sûriyeyê û HSDyê de hêsankariyê bike ji bo pêvajoyeke berpirsyar a entegrasyonê.

Hat tekezkirin ku armanc Sûriyeyeke yekgirtî, xwedî yek artêşa niştimanî û serwer e ku tê de "wekhevî, dadmendî û derfet ji bo hemû gelê wê bin."