Nûnerê Hikûmeta Herêma Kurdistanê yê Swêdê Şoriş Rehîm û nivîskar û civaknas Îsmaîl Beşikcî li Swêdê hevdîtinek kir.

Ofîsa Pêwendiyên Derve ya Hikûmeta Herêma Kurdistanê, bi rêya hesabê xwe yê Facebookê li ser hevdîtinê daxuyaniyek belav kir.

Li gorî daxuyaniyê, qala mijarên wekî “çareseriya aştiyane û diyaloga ji bo pirsgirêkên girîng ên Rojhilata Navîn û pêkvejiyana hemû ol û neteweyan a dûrî tundiyê” hatiye kirin.

Şoriş Rehîm spasiya Beşîkcî kir û anî zimên ku rêzê li “hewl û xebatên Birêz Beşikcî yên piştgiriya domdar a ji bo doza rewa ya gelê Kurdistanê” digire.

“Birêz Beşîkci dostekî rast ê doza Kurdan e”

Ofîsa Pêwendiyên Derve di daxuyaniya xwe de got:

“Îsmaîl Beşikcî ne tenê ramannasekî kûr û dengekî bilind ê serdema me ye, Birêz Beşîkci dostekî rast ê doza Kurdan e.

Çend dehsal in ku ew di rêya azadî û mafên neteweya Kurd û Kurdistanê de piştgir û parêzvanekî domdar ê mafê çarenivîsa Kurdan bûye.”