Li taxên Şêx Meqsûd û Eşrefiyê yên Helebê ku piranî Kurd lê dijîn, elektrîk û înternet bi temamî hatine qutkirin û mazot jî nemaye.

Li gorî çavkaniyên Rêveberiya Xweser, piştî pevçûnên doh ên di navbera Hêzên Ewlehiya Navxwe (Asayîş) û hêzên hikûmeta Sûriyeyê de, dorpêçeke tund li ser her du taxan hatiye danîn.

Hêzên hikûmetê rê nadin ku madeyên xwarinê derbas bibin û nahêlin xelk ji her du taxan derkevin û têkevinê.

Tenê rêyek vekirî ye

Çavkaniyên xwecihî didin zanîn ku heta niha piraniya rêyên li derdora deverên aloz girtî ne.

Hat diyarkirin ku tenê rêya Eşrefiyê – Siryanê li ji bo hatin û çûnê vekirî ye û ew jî di bin tedbîrên tund ên ewlehiyê de ye.

Jinekê canê xwe ji dest da

Li gorî agahiyên Rêveberiya Xweser, top ji derdora Dadgeha Leşkerî û Polîsên Leşkerî, bi taybetî ji nav Baregeha Polîsên Leşkerî ya li Feydê hatine avêtin.

Dûrahiya di navbera cihê avêtina topan û malên ku bûne armanc ji 500 metreyan kêmtir bûye.

Di encama topbaranê de jinekê canê xwe ji dest da û di heman malê de çend kes jî bi giranî birîndar bûne.