Li parêzgehên Mêrdîn û Rihayê yên Bakurê Kurdistanê qedexeya çalakiyan hat ragihandin.

Li her du bajaran hemû cure çalakî, meş û xwenîşandan 5 rojan hatin qedexekirin.

Parêzgariya Mêrdînê ragihand ku ji roja sêşemê heta dawiya roja şemiyê (di navbera 27 û 31ê Kanûna Paşîn a 2026an de), hemû çalakî hatine qedexekirin.

Divê were gotin îro li navçeya Nisêbînê ya Mêrdînê dê meşek were lidarxistin û êrişên li Rojavayê Kurdistanê bên şermezarkirin.

Parêzgariya Mêrdînê di daxuyaniya xwe de îdia kir ku ev qedexe bi hinceta “parastina ewlehiya giştî, rêgirtina li ber bûyerên tundiyê û pêkanîna aramiya bajêr” hatiye ragihandin.

Li Rihayê jî qedexe heye

Piştî Mêrdînê, Parêzgariya Rihayê jî daxuyaniyek belav kir û ragihand ku li seranserê bajêr qedexe hatiye sepandin.

Li gorî daxuyaniyê, meşên xwenîşandanê, çalakiyên rûniştinê, daxuyaniyên çapemeniyê û çalakiyên protestoyî li Rihayê jî 5 rojan hatine qedexekirin.

Ev biryarên qedexeyê di demekê de ne ku li gelek bajarên Bakurê Kurdistanê, xelk ji destpêka êrişên Artêşa Ereban a Sûriyeyê yên li Rojavayê Kurdistanê û herêmên HSDyê ve, daketiye qadan û meşên piştgiriyê li dar dixin.