Di roja 26.07.2025ê de, li Kantona Lozan a Swîsreyê, ji aliyê Enstîtuya Kurdî ya Lozanê ve Komxebat bi navê "Mafê Çarenûsê û Pêşeroja Kurdan" hat lidarxistin.

Komxebat li Chateau d’Ouchy hate çêkirin, ku cihê danûstandinên Peymana Lozanê bû û hin delege di dema danûstandinan de li wir mabûn.

Komxebat di saet 13:00an de bi sirûda neteweyî ya Kurdî “Ey Raqîb” dest pê kir û ji sê rûniştin pêk hatin.

Serokê Enstîtuya Kurdî ya Lozanê Necat Zanyar di destpêka komxebatê de bixêrhatina beşdaran kir û di derbarê armanca konxebatê de kurte axaftinek kir.

Bes ew kesayetên ku hatibûn dawet kirin beşdarî komxebatê bûn.

Komxebat ji sê beşan pêk hatibû.

Mijara Rûniştina Yekem, Dîrok û Hiqûq Bû

Rûniştina yekem bi navê "Dîrok û Hiqûq"ê pêk hat û moderatoriya wê ji aliyê Nara Saadî ve hat kirin. Di vê beşa yekem de, nivîskar, lêkolîner Eîin Çîçek, hiqûqnas Şeyhmûs Ozdemîr û Serokê KURD-KAVê parêzer Mehmet Celal Baykara wekî axaftvan beşdar bûn. Di vê beşê de, Peymana Lozanê, ji alîyê dîrokî û hiqûqî hate nirxandin.

Mijara Rûniştina Duyem, Mafê Çarenûsê û Netew Bû

Di beşa duyem a komxebatê de ku moderatoriya wê Zozan Uçar kir, Şaro Garîp, Behrooz Şujaî, û Dîyax Polat wekî axaftvan beşdar bûn. Di vê beşê de, Peymana Lozanê, mafê çarenûsê û netewbûn ji aliyê nivîskar û akademîsyênên kurd ve hat nirxandin.

Mijara Rûniştina Sêyem, Perpektîfên Siyasî Bû

Di beşa dawîn de ku moderatoriya wê Nazîle Afkhamî kir, mijara nêrîna siyasî ya li ser Peymana Lozanê hat axaftin. Serokê Giştî yê HAK-PARê Duzgun Kaplan, Serokê Giştî yê PSKyê Bayram Bozyel, Serokê Giştî yê PWK Mustafa Ozçelîk Serokê Giştî yê PWKyê, berdevkê PDKS Cemal Meral û berdevkê PAKURDê Gewran Goyî li ser mfê çarenûsîyê, Peymana Lozanê û rewşa sîyasî ya heyî de nêrîn û pêşniyarîyên xwe yên pêşkêş kirin.

Piştî axaftinên serokê giştî yên partiyên siyasî, hemû beşdarên konferansê bi hev re xwarinek xwarin. Di xwarinê de Enstîtuya Kurdî ya Lozanê plaket da ew kesayetên ku alîkarîya enstîtuyê kiribûn.

Serokê Giştî yê Partîya Welatparêzên Kurdistanê (PWK) Mustafa Ozçelîk, di axaftina xwe ya di komxebatê de di derbarê damezrandin û bernameya PWKyê û doza girtinê ya li ser PWKyê de agahdarî da. Herweha li ser sebebên ku heta îro çima kurdan nikarîbûn dewleta xwe ava bikin de bîr û rayên xwe anî zimên. Di berdwamîya axaftina xwe de Mustafa Ozçelîk di derbarê çekdanîna PKKyê, rewşa heyî ya li her çar perçeyên Kurdistanê, Tirkîyeyê û Rojhilata Navîn de bîr û ray û pêşniyarîyên PWKyê pêşkêş kir.

Buroya Ragehandinê ya Partîya Welatparêzên Kurdistanê (PWK)