Li bajarên Îran û Rojhilatê Kurdistanê xwenîşandanên ku ji ber krîza aborî û daxwaza azadiyê dest pê kiribûn di roja 10an de didomin.

Heta niha 29 kesan canê xwe ji dest daye û zêdetirî 1,200 xwenîşander hatine desteserkirin.

Li gorî agahiyên ku rêxistinên mafên mirovan piştrast kirine, tevî midaxeleya tund a hêzên ewlehiyê li 88 bajarên 27 parêzgehan xelk li kolanan e.

Li bajarên Rojhilatê Kurdistanê hêzên rejîmê tundiya xwe zêdetir kiriye.

Ji ber bikaranîna guleyên rastî nûçeyên mirinê tên û atmosfera zextê li hemû bajaran belav bûye.

Di encama gulebarana rasterast de 29 sivîlan canê xwe ji dest da.

Her wiha bi sedan sivîl bi guleyên plastîk û saçmeyan birîndar bûn.

Li gorî çavkaniyên fermî, nêzîkî 300 endamên hêzên ewlehiyê jî birîndar bûne.

Li Îlam, Sine, Kirmanşan û bajarên din ên Kurdan esnafan dikanên xwe girtine û xwendekarên zanîngehê boykotê didomînin.

Li Qurwe û Melekşahiyê mirî hene

Di roja dehem a xwenîşandanan de daxwazên xelkê ji pirsgirêkên aborî derbas bûn û veguherîn sloganên li dijî rejîmê û banga edaletê.

Li gorî rapora HRANAyê, hejmara miriyan li seranserê welat gihîşt 29an. Beşek ji van mirinan rasterast li bajarên Rojhilatê Kurdistanê çêbûn.

Li bajarê Qurweyê yê parêzgeha Sineyê hat piştrastkirin ku xwenîşanderê bi navê Saced Babayî canê xwe ji dest daye.

Her wiha li gorî nûçeya rojnameya Emtedadê ya ku dispêre çavkaniyên herêmî, li bajarê Melekşahiyê yê parêzgeha Îlamê di encama gulebarana hêzên ewlehiyê de herî kêm 3 kesan canê xwe ji dest da û 12 kes jî birîndar bûn.

Li seranserê welat di 24 saetên dawî de li bajarên wekî Merivdeşt û Aznayê jî di encama gulebarana hêzên ewlehiyê de kesên bi navên Reza Moradi Abdolvand, Vahab Ghaedi, Mostafa Fallahi, Mohammad Qasem Rousta, Mansour Mokhtari û Erfan Bozorgi hatine kuştin.

Înternet hat hêdîkirin û îtirafên bi zorê tên weşandin

Hêzên rejîmê ji bo kontrolkirina kolanan ji xeynî tundiyê rêbazên zextê yên teknolojîk jî bi kar tînin.

Înternet li seranserê welat bi temamî nehatiye birîn lê bi zanebûn hatiye hêdîkirin da ku neyê bikaranîn.

Bi taybetî li parêzgehên Îlam, Sine û Kirmanşanê torên ragihandinê hatine felckirin.

Her wiha li girtîgehan dîsa serî li rêbaza "îtirafên bi zorê" dan. Li Tehran, Malard û Parandê û her wiha li bajarê Dereşarê yê Rojhilatê Kurdistanê dîmenên xwenîşanderên desteserkirî yên ku li ber kamerayan bi zorê îfade didin di medyaya fermî de hatin weşandin.

Li Rojhilatê Kurdistanê pêla desteserkirinê

Dema ku li kolanan pevçûn didomin, hêzên ewlehiyê li parêzgehên Îlam, Kirmanşan û Loristanê biserdegirtina malan zêde kirine.

Li gorî rapora Rêxistina Mafên Mirovan a Hengawê, tenê di navbera 1-4ê Kanûna Paşîn a 2026an de herî kêm 29 hevwelatiyên Kurd hatine desteserkirin ku di nav wan de zarokek, xwendekarek û du jin jî hene.

Di xwenîşandanên ku 10 roj in didomin de hejmara giştî ya desteserkiriyan li seranserê welat ji 1203yan borî ye.

Tê texmînkirin ku hejmara rastîn a li bajarên Rojhilatê Kurdistanê ji ya di raporan de hatî diyarkirin gelekî zêdetir e.