Li gundekî herêma Bradostê ya Başûrê Kurdistanê, di dema cotkirina zeviyê de goreke bikom hat dîtin ku dîroka wê vedigere beriya niha bi 2 hezar û 500 salan.

Di gorê de hestiyên 11 mirovan û hespekî hene.

Bûyer li gundê Xelîfanê yê li bakurrojhilatê bajarokê Sîdekanê çêbû.

Cotkarekî dema zeviya xwe cot dikir, gîsinê wî li gorê ket û ew dît.

Tîmên şûnwariyê gihîştin cihê bûyerê û bermahî û parçeyên cêran kom kirin.

"Paşa û parêzvanên wî"

Li gorî lêkolînên destpêkê, kûrahiya gorê metreyek û nîv e û ya "Serdema Hesin" e.

Di gorê de hestiyên 11 mirovan, hespek û du cêr hatine dîtin.

Tê pêşbînîkirin ku ev vedîtin nehêniyên jiyan û mirina mirovan, şaristanî û baweriyên olî yên hezarsala yekem a berî zayînê ya wê serdemê ronî bike.

Welatiyê bi navê Celar Uzêrê ku gor dîtiye ji Rûdawê re got:

"Ez mijûlî cotkirina zeviya xwe bûm, min dît ku çalek derket.

Min bi ronahiyê mêze kir û min dît ku jûrek e û dîwarê wê hatiye hûnandin.

Li gorî bîranînên me û bav û kalên me, ev zevî qet nebûye cihê avahiyan û goristan lê nebûye, ev cara yekem e ku tiştekî wiha tê dîtin."

"Şêweyê gorê wekî belemê ye"

Birêvebirê Şûnwaran ê Soranê Ebdulwehab Silêman li ser girîngiya dîrokî ya vedîtinê ragihand:

"Şêweyê gorê wekî belemê ye û dîroka wê vedigere beriya niha bi 2 hezar û 500 salan.

Ev dîrok bi rêya wan cêran derket holê ku bi miriyan re hatibûn binaxkirin."

Birêvebirê Şûnwaran ê Soranê wiha anî zimên:

"Em difikirin ku kesê sereke yê di gorê de paşaekî herêmê be û ew 10 zilamên din ên ku bi wî re hatine binaxkirin, xizmetkar û parêzvanên wî bin.

Ew ji bo ku di cîhana miriyan de hevaltiya paşaê xwe bikin bi wî re hatine binaxkirin."

Hestî û parçeyên şûnwariyê ji bo lêkolînên zêdetir veguhastine navendên lêkolînan ên şûnwariyê.

Li gorî amaran, li sînorê Îdareya Serbixwe ya Soranê heta niha hezar û 150 cihên şûnwariyê hatine dîtin û tomarkirin ku 180 ji wan li herêma Bradostê ne.