Malpera nûçeyan a Amerîkî Axiosê ragihand ku berpirsên payebilind ên Sûriye û Îsraîlê îro li Parîsê dicivin da ku dest bi dan û standinên ewlehiyê bikin.

Li gorî nûçeya malperê ku agahiyên xwe dispêre berpirsekî Îsraîlî û çavkaniyeke din, armanca sereke ya civînê destpêkirina dan û standinan e li ser peymaneke ewlehiyê.

Hat ragihandin ku ev hevdîtin bi navbeynkarî û zexta Amerîkayê pêk tê.

Armanc ew e ku sînorê di navbera Sûriye û Îsraîlê de were aramkirin û dibe ku ev hevdîtin bibe gava yekem a ber bi asayîkirina pêwendiyên her du aliyan.

Şande ji kîjan aliyan pêk tên?

Li gorî nûçeyên di medyaya Îsraîlê de, Wezîrê Karên Derve yê Sûriyeyê Esed Şeybanî dê serokatiya şandeya Sûriyeyê bike.

Li aliyê din, Balyozê Îsraîlê yê Amerîkayê Yechiel Leiter dê serokatiya şandeya Îsraîlê bike.

Her wiha Nûnerê Taybet ê Amerîkayê yê ji bo Kar û Barên Sûriyeyê Thomas Barrack jî dê di civînê de amade be û rola navbeynkariyê bibîne.

Ti daxuyaniyeke fermî nîne

Tevî belavbûna van zanyariyan, heta niha hikûmetên Sûriye û Îsraîlê bi awayekî fermî ti daxuyanî derbarê vê civînê de nedaye û ev hevdîtin piştrast nekiriye.