Berdevkê Desthilata Dadê ya Îranê ragihand ku ji ber êrişa Îsraîlê ya hinek girtî ji Girtîgeha Evînê reviyane.

Berdevkê Desthilata Dadê ya Îranê Esxer Cehangîrî got:

“Hejmara kesên ku di dema êrişê de reviyane kêm e û hewl tê dayîn ku ew dîsa bên desteserkirin û vegerandin.”

Cehangîrî derbarê girtiyên ku di êrişê de hatine kuştin jî anî ziman:

“Bi giştî 5 girtî şehîd ketine ku ji ber tawanên darayî hatibûn girtin.”

Esxer Cehangîrî anî ziman ku ji bo texmînkirina zererên girtiyan û malbatên wan komîteyek hatiye avakirin û her wiha dê belge li ser kelûpelên li derdora girtîgehê zerer dîtine bên komkirin û awayên qerebûkirinê jî bên nirxandin.

23ê Hezîranê ku roja 11emîn a şerê Îran û Îsraîlê bû, Îsraîlê Girtîgeha Evînê ya li Tehranê kiribû armanc.

Berdevkê Desthilata Dadê ya Îranê Esxer Cehangîrî 30ê Hezîranê ragihandibû:

“Di êrişa li Girtîgeha Evînê de 79 kesên ku ji girtî, malbatên wan, karmendên girtîgehê û niştecihên taxên nêzîk pêk dihatin hatin kuştin û hejmarek kes jî birîndar bûn.”

Îsraîlê 13ê Hezîranê êrişî Îranê kiribû, Îranê jî bi mûşekên balîstîk û dronên bombebarkirî bersiv da.

Amerîka 22yê Hezîranê tevlî şer bû û êrişî navendên atomî yên Fordo, Netenz û Îsfehanê kir.

Serokê Amerîkayê Donald Trump 25ê Hezîranê agirbest ragihandibû.