Rojnameger Gunay Aslan li ser mijara pêvajoya çareseriyê ya Pirsgirêka Kurdan got, “Meseleya Kurdan neteweyî ye, ne meseleyeke entegrasyonê ye.”

Rojnameger Gunay Aslan bû mêvanê Rûdawê û li ser pêvajoya çareseriyê, danîna çekan a PKKyê pirsên Hêvîdar Zanayê bersivandin.

Gunay Aslan diyar kir ku dewleta Tirkiyeyê bi têgeha “Tirkiyeya Bêteror” hewl dide pirsgirêka Kurdan înkar bike û got, “Tiştê ku wan daniye ber Kurdan tasfiyekirin e.”

Aslan bal kişand ser cewhera pirsgirêkê û anî ziman ku dewlet naxwaze statuya neteweyî ya Kurdan qebûl bike lê dixwaze wan bike beşeke sîstem û rejîma heyî.

Gunay Aslan anî ziman, “Meseleya Kurdan neteweyî ye, ne meseleyeke entegrasyonê ye” û da zanîn ku armanca dewletê ne çareserî ye.

“Siyaseta dewletê sedema şer bû”

Gunay Aslan stratejiya dewletê ya niha şîrove kir û got, “Dewlet bi gotina Tirkiyeya Bêteror dibêje ku di nava pêvajoyê de Pirsgirêka Kurdan nîne.”

Aslan anî ziman ku şer ne ji ber Kurdan, ji ber polîtîkayên dewletê derketiye û êdî her kes ji vî şerî westiyaye û zerer dîtiye û da zanîn:

“Siyaseta dewleta Tirkiyeyê sedema şer bû.

Her kes ji şer bêzar bûye û şer zerer da her kesî.”

Li ser nêrîna navneteweyî jî Aslan amaje pê kir ku civaka navneteweyî dixwaze ev pirsgirêk çareser bibe û got, “Cîhan ji Tirkiyeyê re dibêje, pêvajo derfeteke dîrokî ye.”

Gunay Aslan li ser paşeroja pêvajoyê ne geşbîn e û diyar kir ku armanca dewletê ne avakirina aştiyeke mayînde, tasfiyekirina doza Kurdan û got:

“Ez bawer nakim ku di vê pêvajoyê de em bigihêjin aştiyeke mayînde.

Tiştê ku wan daniye ber Kurdan tasfiyekirin e.

Tirk dixwazin Kurdan bikin parçeyeke rejîmê.”

Pêvajoya çareseriyê û danîna çekan a PKKyê

Hikûmetê Tirkiyeyê pêvajoya çareseriyê wekî “çekdanîna PKKyê” û bidawîanîna “terorê” pênase dike.

Li aliyê din, DEM Partî û beşeke mezin a raya giştî ya Kurdan israr dikin ku pirsgirêk ne tenê danîna çekan e, Pirsgirêka Kurdan bi xwe ye ku divê bi rêyên siyasî û bi naskirina mafên neteweyî û çandî were çareserkirin.

Komeke gerîlayên PKKyê 11ê mehê li Şikefta Caseneyê yê Silêmaniyê çekên xwe şewitandin.

Di merasîma îmhakirina çekan de ya Koma Aştî û Civaka Demokratîk, Hevseroka Konseya Birêvebir a KCKyê Besê Hozat û komeke gerîlayan cih girt.

Merasîma îmhakirina çekan a Koma Aştî û Civaka Demokratîk bi dema Kurdistanê saet 11:25an dest pê kir û saet di 11:45an de bi dawî bû.

Di nava Koma Aştî û Civaka Demokratîk de Hevseroka Konseya Birêvebir a KCKyê Besê Hozat, Nedîm Seven, Têkoşîn Ozan û Tekîn Mûş hebûn.

30 gerîlayên ku 15 jin, 15 jî mêr bûn û li pêşiya wan Besê Hozat û Nedîm Seven hebûn.

Piştî daxuyaniyê û axaftinan di serî de Besê Hozat gerîlayan çek û rextên xwe şewitandin.

Gerîla piştî ku çekên xwe şewitandin ji herêmê çûn û merasîm bi dawî bû.

Rûdaw