Hikûmeta Fransayê dilgiraniya xwe ya li ser destpêkirina ducare ya pevçûnên li taxa Şêx Meqsûd a bajarê Helebê anî zimên û bangî hemû aliyan kir ku yekser vegerin ser rêkeftina agirbestê.

Wezareta Karên Derve ya Fransayê di daxuyaniyekê de daxwaz kir ku rê ji bo gihandina alîkariyên mirovî were vekirin û parastina şêniyên bajêr were kirin.

Fransa piştgiriyê dide wan pêşniyarên ku armanca wan parastina hemû sivîlên li Helebê ye, wekî wê soza ku hikûmeta Sûriyeyê dabû.

Wezareta Karên Derve ya Fransayê her wiha xwest ku rê were dayîn şervan bi awayekî "bi rûmet" ji herêmê vekişin.

Parîsê teqez kir ku ew dê li gel hevparên xwe, di serî de Dewletên Yekbûyî yên Amerîkayê, ji bo vegerandina ewlehî û aramiya Helebê di çarçoveya Sûriyeyeke yekgirtî, xwedîserwer û pirreng de xebatên xwe bidomîne.

Ev helwesta Fransayê di demekê de ye ku pevçûnên tund ên di navbera Artêşa Ereban a Sûriyeyê û şervanên Kurd de li taxên Şêx Meqsûd û Eşrefiyeyê ji 6ê Kanûna Paşîn a 2026an ve dest pê kirine.

Li gorî amarên dawî, ev şer bûye sedema koçberbûna zêdetirî 159 hezar kesan.

Ev gurtirbûna aloziyan piştî wê yekê tê ku bicihkirina Peymana 10ê Adara 2025an a ji bo tevlîkirina hêzên Kurdî di nav hikûmeta nû ya Sûriyeyê de rûbirûyî astengiyan bû.

Fransayê wekî hevalbendekî navneteweyî berê jî daxwaz kiribû ku hemû pêkhateyên Sûriyeyê di nav hikûmetê de werin temsîlkirin û werin parastin.