Hakan Fîdan got, "Divê em hejmara deriyên sînorî zêde bikin. Divê em deriyên sînorî çalaktir bikin."

Wezîrê Karên Derve yê Tirkiyeyê Hakan Fîdan bi serdaneke fermî çû Îranê.

Hakan Fîdan li Tehranê bi Wezîrê Karên Derve yê Îranê Ebas Eraqçî re civiya û piştî civînê konferanseke hevpar a rojnamegeriyê li dar xist.

Fîdan diyar kir ku dema erka wezîrtiyê dike ev cara çaran e ku diçe Îranê û di erkên xwe yên berê de jî çûye Îranê.

Fîdan da zanîn ku ew û Eraqçî di platformên navneteweyî de pir caran tên gel hev û hemû bipêşketinên girîng bi telefonê gotûbêj dikin û ji ber hevkariyê spasiya hevtayê xwe kir.

"Divê em hejmara deriyên sînorî zêde bikin"

Fîdan tekez kir ku hevdîtin gelekî berhemdar derbas bûn û wan gelek mijarên ku rasterast têkildarî refah û aboriya her du aliyan in, bi taybetî bazirganî û enerjî gotûbêj kirine.

Fîdan amaje pê kir ku ji bo bipêşxistina bazirganiyê divê gelek tişt werin kirin, bi taybetî bikaranîna bi bandor a sînoran û got:

"Di warê girêdanbûn, veguhastin û lojîstîkê de wekî du welatan em hinekî li paş tiştên ku divê me bikira mane.

Di vê mijarê de gavên ku divê em biavêjin hene. Divê em hejmara deriyên sînorî zêde bikin. Divê em deriyên sînorî çalaktir bikin."

Fîdan bal kişand ser wê yekê ku nifûs û aboriya Îran û Tirkiyeyê mezin in û her du civak gelekî nêzîkî hev in.

Li Wanê konsulxaneya Îranê tê vekirin

Fîdan da zanîn ku her du alî di nav têkiliyeke xurt de ne, bazirganiyê dikin û her sal bi milyonan kes di navbera Îran û Tirkiyeyê de geştan dikin.

Fîdan li ser gotinên Eraqçî yên derbarê vekirina konsulxaneya Îranê ya li Wanê di demeke nêzîk de wiha axivî:

"Em bi kelecan li benda vekirina konsulxaneya li Wanê ne. Înşalah min soz da hevtayê xwe jî, eger ew were ez jî dê biçim wê derê û em dê bi hev re vekin."

Konseya Hevkariya Asta Bilind a Tirkiye-Îranê

Fîdan destnîşan kir ku bi taybetî di mijara têkoşîna li dijî koçberiya neyasayî de pirsgirêkên ku ji cografyaya nêzîk derdikevin hene û divê di vê mijarê de bi Îranê re hevkariyê bikin û got:

"Bi taybetî em li ser wê yekê rawestiyan bê em çawa dikarin bi hev re li dijî koçberiya neyasayî ya ji Efxanistanê tê têbikoşin û em çawa dikarin bi hikûmeta Efxanistanê re bixebitin."

Cezayên li ser Îranê

Fîdan diyar kir ku wî ji Eraqçî re gotiye Enqere di dan û standinên nukleerî de her tim li cem Tehranê ye û got:

"Armanca me ew e ku Îran di çarçoveya hiqûqa navneteweyî de, bi çareserkirina pirsgirêkê re ji cezayan rizgar bibe û entegrasyona herêmî di warê aborî û qadên din de bi lez berdewam bike."

Fîdan ragihand, ew di her derfetê de tînin ziman ku ev cezayên ku Îran bi salan e rûbirû maye neheq in û Tirkiye amade ye ji destê wê çi bê bike da ku pêvajoyên didomin bigihin encamekê.

Eraqçî: Em kêfxweş in ku PKK çekan deyne

Wezîrê Karên Derve yê Îranê Ebas Eraqçî jî diyar kir ku ew kêfxweş in ku PKK çekan deyne.

Eraqçî got, "Em bi kêfxweşî çekdanîna PKKyê pêşwazî dikin. Em piştgiriyê didin paqijkirina Tirkiyeyê ya ji terorê."

Wezîrê Îranî behsa têkiliyên bazirganiyê jî kir û amaje bi rakirina astengiyên li pêşiya bazirganî û veberhênana di navbera her du welatan de kir û got:

"Îran amade ye ku peymana gazê ya bi Tirkiyeyê re dirêj bike û hevkariya di warê enerjiyê de bi pêş bixe."

Eraqçî da zanîn ku mijarên wekî vekirina deriyekî nû yê sînorî û navendên bazirganiyê, girêdana her du welatan bi xeta trênê û civîna pisporan a ji bo bazirganiya tercîhî hatine gotûbêjkirin.

Eraqçî got, di demeke nêzîk de Konsulxaneya Îranê ya li Wanê dê were vekirin û ev yek dê lezê bide têkiliyên dualî.

Eraqçî diyar kir ku dan û standinên nukleerî yên Îranê, cezayên Amerîkayê, hewldanên hevpar ên li ser Filistînê, binpêkirina agirbesta li Xezeyê ji aliyê Îsraîlê ve û mijarên herêmî û navneteweyî jî hatine gotûbêjkirin û got:

"Aramî û îstîqrara Sûriyeyê girêdayî parastina yekparçeyiya axa wê ye û gefa herî mezin ji Îsraîlê tê."