Wezîrê Karên Derve yê Tirkiyeyê Hakan Fîdan ragihand ku li Sûriyeyê gelek partiyên Kurdan hene ku dostên wan in û got, "Li Sûriyeyê Encûmena Niştimanî ya Kurd a Sûriyeyê (ENKS) û tenê YPG nîne."

Wezîrê Karên Derve yê Tirkiyeyê Hakan Fîdan îşev di bernameyeke TGRT Haberê de li ser rûdanên herêmî û cîhanî axivî û peyamên girîng dan.

"Ne tenê YPG heye"

Hakan Fîdan diyar kir ku li Sûriyeyê ji bilî Yekîneyên Parastina Gel (YPG)  gelek partiyên Kurdan ên din jî hene ku ew wan wekî dost dibînin û got:

"Li Sûriyeyê gelek partiyên Kurdan hene ku dostên Tirkiyeyê ne û dixwazin l igel me hevkariyê bikin."

Fîdan îdia kir ku piştî daxuyaniya Serokkomarê Tirkiyeyê Recep Tayyîp Erdogan a ku gotibû "yên berê xwe bidin Enqere û Şamê dê bi ser kevin", hinek endamên ENKSyê bi berpirsên Tirkiyeyê re ketine pêwendiyê.

Li gorî gotina Fîdan, endamên ENKSyê gotiye, "Em berê xwe didin Enqereyê, werin alîkariya me bikin."

Fîdan ev yek wekî "tiştekî girîng" bi nav kir û got, "Em piştgiriyê didin çalakiyên wan partiyên ku ji ti kesî re nabin pirsgirêk."

"Dijminatiya me nekin"

Wezîrê Karên Derve yê Tirkiyeyê tekezî li ser ewlehiya sînorên xwe kir û peyameke tund da:

"Dema dijminahî li hemberî me neyê kirin, em dijminatiya kesî nakin.

Lê dema li ser sînorên me gef hebe, em ranawestin ku li me bê xistin.

Dema dijminatiya me bê kirin, em paşde gav naavêjin. Peyama me ji bo hemû aliyan ev e, dijminatiya me nekin."

Hakan Fîdan her wiha got, "Her nearamiyeke li Sûriyeyê çêbibe bandorê li me dike.

Enqere piştî rûxandina desthilata Esed jî piştevaniya birêvebirya nû ya Şamê dike.”