Endamê Desteya Rêveber a Nûnertiya Rêveberiya Xweser a li Silêmaniyê, Fethullah Huseynî ragihand, ji bo paşerojeke demokratîk li Sûriyeyê, pêwîst e mafên gelê Kurd, wek neteweya duyem di destûra nû ya welat de bi awayekî fermî bên çespandin û sîstemeke federal û nenavendî bê pejirandin.

Fethullah Huseynî ji K24ê re diyar kir, hişmendiya navendî ya Şamê divê rûbirûyê rastiya Sûriyeyê bibe ku welatekî piralî û pirpêkhate ye. Husênî got: "Divê Şam, pirsa federaliyetê û hişmendiya vê yekê qebûl bike. Sûriye welatekî piralî ye û pêwîstî bi sîstemeke siyasî ya nenavendî heye." 

Huseynî tekezî li ser wê yekê kir, serdema sîstemên dîktatorî bi dawî bûye û gelên Sûriyeyê êdî sîstemeke wiha qebûl nakin û got: "Welatekî dîktatorî careke din ne Kurd qebûl dikin, ne Durz qebûl dikin û ne jî Elewî qebûl dikin. Em li ser wê meseleyê rijd in ku Sûriye bibe welatekî piralî, nenavendî û bi taybetî federal."

Endamê Desteya Rêveber a Nûnertiya Rêveberiya Xweser amaje bi wê yekê jî kir, gelê Kurd ji bo parastina axa Sûriyeyê "qurbaniyeke gelek mezin" daye û xwedî mafên rewa ye. Herwiha got: "Kurd qurbaniyeke gewre daye li ser nexşeya Sûriyeyê. Ji ber vê yekê, divê Kurd mafê xwe wek neteweya duyem werbigire û mafên wan di destûrê de bên çespandin."

K24