Xelkê Xebatkar û mafxwaz ê Kurdistanê!

Ji roja şemî 9ê reşemê ve pêvajoya bûyerên li Îranê ber bi guherînên kûr û bingehîn ve diçin. Ev şerê ku niha qewimî ye, encama dehan salî siyaseta zêdexwaziya rêjîmê, destêverdan li karûbarên welatên deverê, piştevanîkirin li terorîzma dewletî, pêdegirî li ser bidestxistina bomba navikî û pêşxistina pîşeyî ya mûşekî, û gefa wê li ser ewlehiya cîhanî û guhnedan bi yasayên navnetewî ye; Siyasetek ku cara dawî hem Îran kire welatekî kawil bi aboriyeka îflaskirî û hem rêjîma xwe jî ber bi herifînê ve bir. Kuştina Xamineyî rêberê rêjîmê û dehan fermandeyên serbazî û karbidestên siyasî yên rêjîmê jî domînoya herifînê lezgîntir kiriye.

Hevpeymaniya Hêzên Siyasî yên Kurdistana Îranê radigehîne ku ev şer, şerê civaka Îranê û neteweyên vî welatî digel Amerîka û Îsraîlê û civaka cîhanî nîne, belku eva rêjîma dîktator û tepeserker a komara îslamî ye ku hemû xelkê welat bi barimte girtiye, û hemû maf û azadiyek jê zewt kiriye û her li heyva befranbara îsal bi hezaran kesî ji xelkê serhildayî û mafxwaz ê Îranê komkuj kir. Niha jî ku Îran û Rojhilatê Kurdistanê li ber qedersaztirîn rojên xwe de ye, rû li civaka Kurdistanê, em wan daxwaziyan dikin:

1- Xelkê Kurdistanê li gor pêvajoya bûyeran, hewce ye ku hişyar bin û bi hişarî rûberûyê pêşhatan bibin û reftara siyasî ya xwe digel daxwaz û pêspartiyên Hevpeymaniya Hêzên Siyasî yên Kurdistanana Îranê rêk bixin û vê hevahengî û pêwendiyê zindî û berhemdar bikin.

2- Di rojên şikestxwarina rêjîmê û serhildana giştî ya xelkê de hewce ye hemû binke û demûdezgehên îdarî û xizmetguzariyê li pêxema berjewendî û hewcehiyên giştî de bêne parastin.

3- Em daxwazê ji hêzên çekdar ên rêjîmê li Kurdistanê dikin ku refa xwe ji paşmayiyên  Komara Îslamî cuda bikin. Em bi wan radigehînin ku wiha baş e ku vê derfetê bo piştkirin li dijmin û hilbijartina bereya neteweya xwe ji dest nedin.

4-Hewce ye ku hemû xelkê Kurdistanê bi hişmendî û têgihîştin ve rûberûyê guherînkariyan bibin û xwe ji gefxwarin û tolhildana takekesî ku xisarê digihîne ewlehî û parastina giştî ya civakê, xwe biparêzin.

5- Em daxwaz dikin ku li pêxema parastîbûna zêdetir her çiqas ku bikarin, ji binke û navendên serbazî yên rêjîmê dûr bikevin.

Em daxwaz dikin ku li rojên dijwar ên li pêşiya me de xelkê me bi taybet qata bazarî û dikandar û xwdiyên malan, ji her demekê zêdetir hay li hevdu bi taybet xelkê kirêçî, hejar û desteng bin û bi destgirtina hevdu, wan rojên dijwar derbas bikin.

Hevpeymaniya Hêzên Siyasî yên Kurdistana Îranê digel pêvajoya bûyeran dê siyaset û bernameyên xwe bi rêya daxuyaniyên xwe ên din dê belav bike.

Hevpeymaniya Hêzên Siyasî yên Kurdistana Îranê

11.12.1404

02.03.2026