Serokwezîrê Îsraîlê ragihand ku ew li ser avakirina herêmeke bêçek û korîdoreke mirovî ji bo Siwêdayê di nava dan û standinan de ne.

Fransa jî piştrast dike ku civînên di navbera Îsraîl û Sûriyeyê de li Parîsê hatine lidarxistin.

Serokwezîrê Îsraîlê Benjamin Netanyahu ragihand ku ji bo bêçekkirina başûrê Sûriyeyê û vekirina korîdoreke mirovî ji bo bajarê Siwêdayê ku piraniya şêniyên wê Durzî ne "niha gotûbêj tên kirin."

Ev daxuyanî wekî mikurhatina nerasterast a hebûna dan û standinan di navbera Îsraîl û Hikûmeta Sûriyeyê de tê dîtin.

Netanyahu doh li gel nûnerên Durziyên Îsraîlê civiya û di vîdeoyeke ku ji aliyê ofîsa wî ve hat belavkirin got, "Ev gotûbêj niha, di vê kêliyê de tên kirin."

Fransa piştrast dike: Li Parîsê civînên veşartî çêbûne

Wezareta Karên Derve ya Fransayê ji Ajansa France-Presse re piştrast kir ku Fransayê hêsankarî ji bo civîna di navbera Wezîrê Karên Derve yê Sûriyeyê Eshed Hesen Şeybanî û Wezîrê Kar û Barên Stratejîk ê Îsraîlê Ron Dermer de kiriye.

Civîn roja 19ê Tebaxê "bi navbeynkariya Amerîkayê" li Parîsê pêk hatiye.

Ev civîna duyemîn a bi vî rengî bû ku li paytexta Fransayê hatiye lidarxistin.

Wezareta Karên Derve ya Fransayê got, "Ev hewl di çarçoveya piştgiriya me ya ji bo diyaloga di navbera Sûriye û Îsraîlê û bihêzkirina cîrantiya baş de ne ku ji bo aramiya herêmê faktoreke sereke ye."

Ajansa Fermî ya Sûriyeyê (SANA) jî berê amaje bi civîna Parîsê kiribû û ragihandibû ku tê de behsa "dosyayên taybet bi bihêzkirina aramiya li herêmê û başûrê Sûriyeyê" hatiye kirin.

Parastina Durziyan, herêma bêçek û alîkariya mirovî

Netanyahu ji şêxên Durziyên Îsraîlê re got ku niha ew bala xwe didin ser sê xalan ku ew jî wisa ne:

Parastina civaka Durziyan li parêzgeha Siwêdayê û herêmên din.

Avakirina herêmeke bêçekkirî ku ji bilindahiyên Golanê heta başûrê Şamê dirêj bibe û Siwêdayê jî li xwe digire.

Vekirina korîdoreke mirovî ji bo gihandina alîkariyan – ji xwarinê heta materyalên avahîsaziyê – û pêşkêşkirina alîkariyeke berfireh a bijîşkî.

Li Çiyayê Manê alozî: Îsraîlê êrişî hêzên Sûriyeyê kir?

Li aliyê din, SANAyê roja pêncşemê ji zarê çavkaniyeke hikûmetê belav kir ku hêzên Sûriyeyê roja sêşemê li Çiyayê Manê "dezgehên çavdêrî û sîxuriyê" dîtine.

Li gorî SANAyê, "dema hewl hatiye dayîn ku ew dezgeh bên bêkaranîn, cihê bûyerê rastî êrişeke asmanî ya Îsraîlê hatiye ku di encamê de kuştî û birîndar çêbûne."

Îsraîlê pêkanîna êrişê piştrast nekiriye lê Wezîrê Parastinê Yisrael Katz diyar kir ku hêzên wan "şev û roj, li her cihê ku pêwîst be, ji bo parastina ewlehiya welat kar dikin."