Serokê berê yê parlamentoya Tirkiyeyê Bulent Arinç di civîna Komîsyona Çareseriyê de bal kişand ser “Mafê Hêviyê” û diyar kir ku pêwîstî bi efûyeke giştî heye.

Arinç her wiha got divê biryarên Dadgeha Mafên Mirov a Ewropayê bên pêkanîn û siyasetmedarên Kurd ên li derve karibin vegerin welat.

Komîsyona Hevgirtina Netewî, Biratî û Demokrasiyê 7emîn civîna xwe li dar xist.

Endamên Komîsyonê di civîna îro de guh da serokên berê yên parlamentoya Tirkiyeyê.

Serokê berê yê parlamentoya Tirkiyeyê Bulent Arinç jî di civîna de axivî û xwest ku "Mafê Hêviyê" bê bicihkirin û efûyeke giştî bê ragihandin.

"Efûya Giştî pêwîstiyeke girîng e"

Arinç di axaftina xwe de destnîşan kir ku berî her tiştî divê biryarên Dadgeha Mafên Mirov a Ewropayê (DMME) û Dadgeha Destûra Bingehîn bên bicihkirin.

Bulent Arinç amaje bi wê yekê kir pêwîstî bi destûreke nû heye û got:

"Ew mafê hêviyê yê ku birêz Bahçelî anî ziman, divê bê bicihkirin.

Divê em nefikirin ka dê kî jê sûdê werbigire. 10 sal di ser biryarên Dadgeha Mafên Mirov a Ewropayê re derbas bûne.

Efûya Giştî jî pêwîstiyeke girîng e. Bêbaweriya li hemberî darazê gihiştiye asteke bilind û divê ev rewş bê sererastkirin."

"Pêwîst e siyasetmedarên Kurd vegerin"

Serokê berê yê parlamentoyê her wiha amaje bi rewşa siyasetmedarên Kurd ên li derveyî welat kir û got ku ji bo pêvajoyeke serkeftî, pêwîst e ew jî karibin vegerin Tirkiyeyê.