Etiya Şêx Ehmedî sala 1999an ji banekî ket, bijîşkan ji re gotibû tenê 20 rojên wê mane ku bijî.

Lê ew li jiyanê ma û bi dehan pirtûk nivîsandin.

Çîroka serkeftinê ya vê jina Kurd gelek kesan matmayî dihêle.

“Ji wê demê ve min 60 pirtûk nivîsandine”

Etiya Şêx Ehmedî li ser vê serpêhatiya xwe ji Rûdawê re axivî û got:

"Bijîşkan ji min re got ku 20 rojên min mane.

Piştî ku ez baş bûm, destên min dikaribûn bilivin û min biryar da ku pirtûkan binivîsim.

Ji wê demê ve min 60 pirtûk nivîsandine. Yek ji wan jî otobiyografiya min e."

Ehmedî bi Kurdî û Farisî dinivîse û heta niha 25 pirtûkên wê hatine çapkirin.

Her roj bi kursiyê xwe yê bi teker derdikeve derve û li bajarê Sineyê yê Rojhilatê Kurdistanê li cihekî guncav digere da ku maseyekê deyne û pirtûkên xwe bifiroşe.

“Ew nivîskareke çalak e”

Welatiyekî ku pirtûkeke Etiyayê kiriye got:

"Ez bi tesadufî di vir ve derbas dibûm. Min ev xanim dît.

Ew nivîskareke çalak û xanimeke gelekî hêja ye. Li ser kursiyê bi teker be jî, em bi rastî pê serbilind dibin.

Wê li Kurdistanê pirtûkên gelekî xweş nivîsandine û karê destan jî dike."

Ebas Zeynebiyê xelkê Sineyê jî got ku Etiya tevî astengiya xwe ya fîzîkî jî "hêzdar û bi biryar" e.

Etiyayê her wiha zêdetirî 5 hezar karên destan çêkirine. Ew wan jî li gel pirtûkên xwe difiroşe.

Etiya Şêx Ehmedî ji Şaredariya Sineyê xwestiye ku cihekî jê re peyda bike da ku karibe pirtûk û karên xwe yên destan nîşan bide û bifiroşe.

Ew hêvî dike ku bi pereyên ku qezenc dike pirtûkên xwe yên din jî çap bike.