VATEYO VERÊN

Partîya Azadîya Kurdîstanî (PAK) û Tevgera Demokratîk a Kurdîstanî (TDK-TEVGER) mabênê rojanê 9 û 10ê êlula 2023î de Amed de kesanê xoseran reyde kongreya xoya yewîye viraşte û Partîya Welatparêzanê Kurdîstanî (PWK) amey ronayîş.

PWK, semedo ke sey partîyeka qanûnî zî xebata xo biramno dest bi prosedurêkê qanûnî kerd. Goreyê nê prosedurê partîyanê qanûnî, PAK roja 17ê êlula 2023î de Anqara de, binê ewnîyayîşê Heyetê Weçînayîşî yê Çankaya de Kongreya xoya îstîsnayî ya hîrêyîne viraşte. Na kongreya qanûnî de heme delegeyan bi yewrayî nameyê PAK (Partîya Azadîya Kurdîstanî) bi nameyê PWK (Partîya Welatparêzanê Kurdîstanî) bedelna. PWK, nika sey partîyêka meşrû û qanûnî xebatê xo kena.

1. Nasnameyê Partîya Welatparêzanê Kurdîstanî: Partîya Welatparêzanê Kurdîstanî (PWK), partîyeka neteweyî, demokratîk, yasayî û eşkera ya. PWK, xo pê tu kes, zumre, grup, sinif, dîn yan zî mezhebî ya terîf nêkena. PWK, semedê heqê çarenuştişê xo û semedê heqanê neteweyî, demokratîk û kulturî yê miletê kurdî û pêameyanê etnîkî û dînî yê Kurdîstanî û semedê heqanê kurdan ê ke metropolanê Tirkîya de ciwîyenî xebitîyena.

2. Pêameyê Partîya Welatparêzanê Kurdîstanî: PWK, tek îdeolojî, tek nîjad û tek sinife gore hereket nêkena. PWK, yew partîya ke wazena bingehê hemwelatîya Kurdîstanî ser o bi hewayeko tewr hîra komelê kurdî û Kurdîstanîyanê welatparêz û demokratan yê dîndar, sekuler, sosyalîst, lîberal û muhafezekaran mîyanê refê xo de bîyaro têhet û înan rêxistin bikero.

PWK heme ziwan, lehçe û kulturê ke Kurdîstan de estê seycîye û sey dewle- mendîyeka Kurdîstanî vînena. Estbîyayîşê heme kêmnetewe, dîn, mezheb û leh- çeyayan qebûl kena û heq û azadîyanê înan pawena.

3. Persa Kurd û Kurdîstanî: Persa kurd û Kurdîstanî eslê xo de persa heqê tayînkerdişê qederê miletê kurdî ya, bi vateyo bîn persa dewletbîyayîşî ya. Partîya ma, dewletbîyayîşî (dewleteka federale, konfederale yan zî xosere) sey program û hedefo demderg û stratejîk vînena. No heq, wayîrê yew bingehê tarîxî û sîyasî yo. Ma na bawerîye de yê ke no waştişo sereke yê miletê kurdî û heme Kurdîstanîyan o.

Gama ke bingehê hemparîya seyyewbînan ya di miletan û di welatan ser o şertê federasyon yan zî konfederasyonê dewleta di dewletine bêrîn ca do partîya ma çareyanê winasîyan rê amade ba. Partîya ma goreyê rewşe û şertan, eke duştê amancanê xo yê stratejîkan nêbê, çareyanê muweqetan yê cîya-cîyayan rê zî amade ya.

4. Persa Kurdanê Metrepolan: Seke yeno zanayene ewro bi mîlyonan kurdî metropolanê Tirkîya de ciwîyenî. PWK, semedê kurdan ê ke Tirkîya de ciwîyenî heqê ziwan, kultur û heme heqanê komelkî û demokratîkan wazena. Tewrê ney a, PWK, cayê ke kurdî tede zafane yê heqê xoîdarekerdişî yê herêmî zî wazena.

PWK, metropolanê Tirkîya de têkoşînê kurdan yo semedê destvistişê heq û azadîyanê xo hem sey beşekê têkoşînê ma yê neteweyî û demokratîk û hem zî sey beşekê têkoşîn yê semedê azadî û demokrasî yê Tirkîya vînena.

Hûmareka zêde ya kurdan zî sedemanê cîya-cîyayan ra cayê xo ra koçê Ewropa kerdo û nê cayan de ca bîyê. Heto bîn ra Qafqasya û Komaranê Yewîya Sovyetanê verî de û bîlxesa Ermenîstan, Gurcîstan, Azerbeycan û Qazaxîstan de zî bi se hezaran kurdî estê. Goreyê bernameya PWK, Kurdîstaneko azad de heqê heme kurdanê metropolan û yê ke teberê welatî de ciwîyenê esto ke ageyrê Kurdîstan û sey hemwelatîyanê seycîyan welatê xo Kurdîstan de biciwîyê.

5. Tewirê Xebat û Mucadeleyî: Bingehê xebate û tekoşînê PWK Kurdîstanê Vakurî yo. PWK semedê caardişê armancanê xo yê neteweyî, demokratîk û kulturî bêîtiadîya sivîl zî tede do heme rayîr û raybazanê xebate û mucadeleyî yê meşrû, eşkera, legal, sivîl û demokratîkan bixebetno.

Partîya ma verba zulim, teda û neheqîya milî, komelkî û cinsî ya ke cinîyanê Kurdîstanî ser o esta mucadele kena û semedê heq û azadîyanê cinîyan yê ke pêameyîşanê mîyanneteweyî de ca genî bêrî qebulkerdiş û caardiş tedbîranê zarûrî yê qanûnî, komelkî û îdarî gena û no war de xebata hîra kena.

Partîya ma seba perwerdekerdişê ciwa- nanê xobawer, zanaye û bi tecrubeyanê xo qerar danê, wayîrê fikrê azadî yê, demokrat û wayîrê toleransî yê xîret kena û no war de xebat kena. PWK seba kar, perwerde û ameyoxo murefeh yê ciwanan garantî bibî xebat kena û ney xo rê sey wezîfeyeko milî vînena.

6. Persa Yewîye û Hemkarîyan: PWK, bidestvistiş û garantîya azadî û heqanê neteweyî û demokratîkan caardişê yewî hemkarî û îradeyeko siyasî yo hîra de vînena. Senî ke ma lazimîya yewîya siyasî û rêxistinî muhîm vînenê, eynî hewa ma xetêka neteweyî, demokratîk, azadîwaşt û Kurdîstanî ser o awankerdişê îttifaq û hemkarîyanê stratejîk û hîrayan zî wina muhîm vînenê. Ma awankerdişê hemkarî û îttifaqeko Kurdîstanî yo hîra û mende, sey beşeka xebate û têkoşînê azadî û xelasîya neteweyî û demokratîk ya stratejîke vînenê.

PWK, awankerdişê hemkarî û plat- formanê waştişanê acîlan hem semedo ke awankerdişê yewîya demderge ya neteweyî û demokratîk hem zî semedo ke rayîrê çarekerdişê persa kurd û Kurdîstanî abibo, gamêka muhîme vînena.

7. Têkilîyê Mabênê Parçeyanê Kurdîstanî: PWK, heme parçeyanê Kurdîstanî de heqê tayînkerdişê qederê miletê kurdî sey heqêko meşrû û bingeyin vînena û nê heqî pawena. Çarekerdişê persa miletê kurdî û Kurdîstanî de muhîmîyeka taybetî dana estbîyayîş û destvistişanê Dewleta Federe ya Kurdîstanê Başurî û destvistişanê parçeyanê bînan yê Kurdîstanî. Ma wayîrvejîyayîş û pawitişê destvistişanê her çar parçeyanê Kurdîstanî xo rê sey yew wezîfeyo neteweyî vînenê.

Her beşê Kurdîstanî do goreyê şert û mercanê xo formê idareyê xo awan biko. La mîyanê beşanê Kurdîstanî de têkilîyê neteweyî û hemrêzîye çîko esasî û bingeyin o.

8. Siyaset û Têkilîyê Mîyanneteweyî: PWK, têkilîyanê xo yê mîyanneteweyî de menfeatê miletê kurdî û Kurdîstanî esas gena. PWK, do siyasetê xo esasê zêde- kerdişê dost û kêmkerdişê dişmenanê miletê kurdî ser o awan bika.

PWK dîplomasî, sîyaset û têkilîyanê xo yê mîyanneteweyî de do dişmenatîya tu milet û şarî nêkero. Partîya ma do siyasetê xo yê mîyanneteweyî de verba neheqî û bêedaletî vindero û paştî bido xebat û têkoşînê semedê azadî, demokrasî, seypîyeyî û edaletî. Eynî hewa PWK do hetkarî bido xebat û têkoşînê miletanê bindestan ê ke verba kolonyalîzm û semedê azadî û xelasîya milî mucadele danî.

9. Statuyê Ziwan û Lehçeyan:Kurdîstanê Vakurî de sîstemê perwerdeyî û îdarî de û her hetê komelî û ciwîyayîşî de her di lehçeyanê (kurmanckî û kirdkî/zazakî) ziwanê kurdkî do sey ziwanê resmî bêro qebûlkerdiş. Heto bîn ra heqê xebitnayîş û averberdişê ziwananê heme pêameyîşanê etnîkîyan ê ke Kurdîstan de ciwîyenî do bêrê garantîkerdiş.

PWK giranîyeka taybetî dana xebetnayîş, pawitiş û averberdişê ziwanê kudkî û kombîyayîş, çalakî, beyanat û pêroyê xebatanê xo de ziwanê kurdkî sey ziwano resmî esas gena.

10. Dezgeh û Sazgehê Neteweyî Demokratîk û Komelkî: Gorê Partîya Welatparêzanê Kurdîstanî ganî ma nika ra û bi lezgînî dezgeh û sazgehanê xo yê neteweyî, demokratîk û komelkîyan awan bikerî. PWK, do hewl bido ke piştgirîya awankerdişê sendîka, komele û rêxis- tinanê sivîlan yê Kurdîstanî bikero. PWK, do biwazo awankerdiş û averberdişê dezgeh û sazgehanê sîvîlan sey Yewîya Mamosteyanê Kurdîstanî, Yewîya Avûkatanê Kurdîstanî, Yewîya Esnafanê Kurdîstanî û dezgeh û sazgehanê sey nînan de wazîfeyê xo yo milî bîyaro ca.