Bi minasebetê yadkerdişê Şêx Saîd û 47 hevalê ey  merkezê Teşkîlatê PAKî yê Amedî ra programê yadkerdişê vorganîze bi.

Temsîlkarê PAK, PSK, Hereketa Azadî û xeylê ronşvîr, sîyasetmedarî beşdarê programê yadkerdişî bî.

Tarîxnas û cigêrayox Kerem Serhatliyî zî derheqê tarîxê îdambîyayîşê Şêx Saîdî û 47 hevalanê ey de melumatêko hîra da meymanan.

Dima ra zî namemyê PAKî ser o Rayverê Heyetê Pêroyî yê PAKî Hanîfî Turanî zî beyanatê PAKî yê derheqê darderbîyayîşê Şêx Seîdî û hevalanê ey de wend.

Beyanatê Partîya Azadîya Kurdistanî (PAK) de wina ame vatiş:

Ma Şêx Seîd û embazanê ey bi hurmet yad kenê

Serekê millî û dînî yê şarê Kurdistanî Şêx Seîd û 47 hevalê xwu 94 serr verî roja 29.06.1925 de, hetê Dewleta Tirkîya ra ameyê dardekerdiş.

Şêx Seîd û embazê xwu, hetê mehkemayêka korsane ra bi şeklêko bêhûqûqî û bi binpaykerdişê hûqûqê mîyanneteweyî, bi cezaya îdamî Berê Koyî yê Amedî de darde bîyê.

Dewleta Tirkîya heta nika zî cayê mezelê Şêx Seîd û hevalanê ey eşkera nêkerdo.

Dewleta Tirkîya, gereka semedê nê dardekerdişan şarê Kurdistanî ra uzrê xo biwaza û cayê mezelanê şehîdan eşkera bika.

Dewaya ke Şêx Seîd û embazanê xwu seba ci cuya xwu feda kerda, bi şehadetê sehezaran torinanê Şêx Seîdî, bi xebat û mucadeleyêko welatperwerane, ewro zî her çar perçeyê Kurdistanî de berdewam a.

Şêx Seîd û heme şehîdê dewaya azadîya Kurdistanî, sey 50 mîlyon Kurdanê cîhanî û heme Kurdistanijan, paweyê mijdanîya azadî û xoserîya Kurdistanî yê.

Bi her hawa serkewtiş û statuteyêko sîyasî her parçeyê Kurdistanî de, do ruhê şehîdanê ma şad biko.

Serrgêra 94ine ya dardekerdişê înan de, ma Şêx Seîd û embazanê ey û heme şehîdanê Kurdistanî bi hurmet anê xo vîrî.
29.06.2019
Buroyê Çapkerdiş û Înformasyonî yê PAKî