Vakurê Kurdistanî de hîrê şaredarîyan rê (Amed, Wan, Mêrdîn) tayînkerdişê qeyûman ser o Partîya Azadîya Kurdistanî (PAK) beyanatêk da û tayînkerdişê qeyûman şermerzar kerd.

Beyanatê PAKî de wina ame vatiş:

Şaredarîyan rê tayînkerdişê qeyûman, çin hesibnayîşê raydayoxan o.

Wezaretîya Karanê Zereyî ya Dewleta Tirkîya, roja 19.08.2019 de Şeredarê Amedî, Wanî û Mêrdînî wezîfe ra girewtî û qeyûm tayînê cayê înan kerd.

Weçînayîşê 31ê Adara 2019î de şarê Amedî, Wanî û Mêrdinî bi rayanê xo şaredarê xo weçînabî. Nê hîrê şaredarîyan rê qerarê tayînkerdişê qeyûman, qerarêko antîdemokratîk o û çin hesibnayîşê îradeyê şarê ê bajaran o. Helbet tayînkerdişê qeyûman nêno qebûlkerdiş.

Qerarê tayînkerdişê qeyûman, qerarêko hûqûqî nîyo. Aşkero ke, no qerar eslê xo de sey hêrişanê eskerî, sey tepiştişan, tewqîfkerdişan û dewayê ke yenê akerdiş sîyasî yo. Qerarê tayînkerdişê qeyûman çin hesibnayîşê îradeyê şarê Kurdî nîşan dano. No, nîşanê binpaykerdişê azadî û demokrasî yo.

Ma verî zî çend rey vatbi û ma nika zî vanê, gere Dewleta Tirkîya fek nê sîyasetê şîdetî û tûjî yo ke dişmenetîya Kurdan ser o ronîyayo ra verado. Gere ma pêro çareserîya heme meseleyan de rayîrê dîyalogî esas bigîre û  seba çareserî, bi ray û raybazanê demokratîk û sîyasî gamî bêrê eştene. Rayê tewr raşt û maqûl no yo.

19.08.2019

Buroya Çapemenî û Têkilî ya PAKî