PAK, PSK, TDK-TEVGER: Newroze Pêrûna Kurdistanîyan rê Pîroz Bo!

PAK, PSK, TDK-TEVGER: Newroze Pêrûna Kurdistanîyan rê Pîroz Bo!

.

A+A-

Ewro  Newroz a.

Newroze serrnewîyê heme şar û neteweyanê Aryanî yo. La semedê miletê Kurd û şaranê Kurdistanî roşanê Newroze wayîrê cayêkê taybetî yo. 

Kurdî û heme şarê Kurdistanî Newroze hetêk ra sey roşanê serra newîye û ameyîşê wisarî pîroz kenê; hetêk ra zî sey roja serehewanayîşî, xoverrodayîşî û tekoşînê azadî û serehewanayîşê Kurdistanî pîroz kenê. 

Felaketê erdlerzê 6ê sibate yo ke xeylê bajaranê Bakurê Kurdistanî û qismêkê bajaranê Tirkîya de qewimîyabî, eslê xo de qetlîamek bi. Felaket de des hezaran merdimî dinyaya xo bedilnay, 150 hezarî ra zêdêr merdimî zî birîndar bîyê. Milyonan kesî zî bêca û ware mendê.

Ayra ma sey Miletê Kurd çi heyf ke bi şahî û govend û keyf ney, bi dej û xem û birînanê nê erdlerzî emser Newroze pêşwazî kenê.

Helbet ke, pa heme felaket û qetlîam û zordestîyan zî, gere ma Newroze, bi armancê vera dagîrkerî û zordarî û sey sembolê xoverdayîşê neteweyî û azadîye pîroz bike. Ayra Newroze  vera dagirkerî, înkar û asîmîlasyonê miletê Kurd bîyo roja berzkerdiş û bihêzkerdişê hişmendîya neteweyî û kurdistanî.

Pa hendê dej û birînanê ma yê her çar perçeyanê Kurdistanî zî, Adirê Newroze ke sembolê estbîyayîş, sereberzî, qirardarî, hêvî, xoverdayîş, sereweradayîş û azadiye yo; do Rojhelat, Başûr, Rojava û Bakurê Kurdistanî de berz bibo.

Bakurê Kurdistanî de pîrozkerdişê Newroze wayîrê cayêkê taybetî yo. Ayra qasê se serrîyo ke Bakurê Kurdistanî de pîrozkerdişê Newroze bi reng û muhtewaya xo û bi hawêko azad nêno pîroz kerdene û qedexe yo. 

No proseso ke ziwanê kurdî rastê jenosîdê asîmîlasyonî  ameyo de, gere ma bi taybetî Newroze bi kurdî pîroz bike; ma bike ke na roje semedê averberdiş û qiseykerdişê ziwanê kurdî biba îmkanêk. Onca gere na roje biba platformêk semedê destvistişê heqanê neteweyî, komelkî û kulturî. Cayê pîrozkerdişê Newroze ganî bibê cayê tekoşînê semedê destvistişanê waştişanê neteweyî û demokratîk û berzkerdişê têkoşînê heqê tayînkerdişê qederê miletê Kurd.

Miletê Kurd tenya bi yewitî, hemkarî û yewrêziya neteweyî do bieşko destvistişanê xo bipawo û semedê azadî û xoserîya Kurdistanî gaman bierzo.

Bakurê Kurdistanî de rewşa nikayîne wezîfeyanê taybetan dana vernîya ma. Ganî partî, rêxistin û hereketê Kurd û Kurdistanî ca de ser waştişanê acîl yê hembar û potansîyela en hîra a Kurdan bêrê têhet û semedê hemkarîyêka hîra a neteweyî, demokratîke gamanê muhîman bierzê. Bicaardişê nê wazîfeyanê neteweyî û tarîxî, do rayîrê çareserîya meseleya Kurd û Kurdistanî weşêr û do destê şarê ma xurtêr biko.

Ma hêvî kenê ke Newroza emserî, semedê yewitî, hemkarî û yewrêzîya neteweyî bibo destpêkêk. Ganî ma wayîrvejyayîş, pawitiş û averberdişê hişmendî û destvistişanê neteweyî, her perçeyêkê Kurdistanî de Newroze de hîna zaf veje vernî.  

Onca gere bi minasebetê Newroze û Newroze ra badê zî, ma xebata resnayîşê ardiman, semedê mexdûranê erdlerzî dewam bike.

Biciwîyo sembolê xoverdayîş û tekoşînê azadî û serehewanayîşê Newroze!

Biciwîyo yewrêziya hêzê neteweyî û demokratîk yê Kurdistanî!

Biciwîyo Newroz!

20.03.2023

 

– Partîya Azadîya Kurdistanî (PAK)

– Partiya Sosyalîst a Kurdistanî (PSK)

– Têgêra Demokratîk a Kurdistanî (TDK-TEVGER)

 

Ev nûçe 188 caran hatiye xwendin
Nûçeya berê û ya piştre

NÛÇEYE ŞÎROVE BIKE

BALKÊŞÎ: Şîroveyên ku têde; çêr, heqaret, hevokên biçûkxistinê û êrîşa li ser bawerî, gel û neteweyên din hebin, dê neyêne erêkirin.
JI kerema xwe re şîroveyên xwe jî bi gramera kurdî ya rast û tîpên kurdî binivîsin