“Ewro 8ê Adare Roja Cinîyanê Dinya ya. Çi heyf ke ewro her cayê dinya de û her çar perçeyanê Kurdistanî de cinî raştê teda, hêrîş, şîdet û qetlîaman yenê. 

Na roja 8ê adare de zî, çi heyf ke Kurdan bi 50 milyon nifûsê xo hema zî nêeşkayê mîyanê dewletanê xoseran yê dinya de cayê xo bigîre. Her çendêk nîmeyê cematê Kurdistanî cinîyan ra yeno pê zî, la cinîyê Kurdan Tirkîya û Bakurê Kurdistanî de heqê perwerdeyîya ziwanê xo yê dayike ra nêeşkenê îstîfade bigîrê. Cinî heqê komelkî, ekonomî, beşdarîya cuyê polîtîkî û warê heqê perwerdeyî de neheqîyêka pîle vînenê. Şer û pêrodayîş û qedexeyî en zêde tesîrêko xirab cinîyan ser o kenê. Cinî hema zî raştê şîdetî û neheqîyan yenê. 

Wezîyetêko winasî de ma vanê, wa 8ê Adare biba roja azadkerdena ala azadîya cinîyan, wa biba roja berzkerdişê ala azadîya Kurdistanî. 

Ewro hem sey cinsîyetêko bindest, hem zî sey qismêkê cematê Kurd û Kurdistanî vera şîddet, tacîz, destdergî, wêranî, neheqî û zulmê ke ma raşte ci ameyî, bi rûmetî ma vengê azadî, seyyewbînî û edaletî berz kenê. 

Cinî perceyêkê komela ke ma tede cuyenê yê la ma zaf heqanê xo ra mehrum ê. Ma do rêxistin û xebatanê xo yê taybetan zî vera cîyatîya cinsî ya her qayde û vera neheqîyan vengê xo kenî berz, mucadeleyê xo domnenê 

Ganî ma bizane ke, azadîya cinîyan, tarîxê nerdimatî de her wext bîya mifteyê berê azadî. Her çî ra ver gere ma naye bizane. 

Ma zanê û ganî ma bizane ke cinî, helqeya ewilî ya heme erc, edet, ziwan û kulturê netewî ya Kurdan ê. Cinî mabênê vizêr, ewro û sibarojî de pird ê. 

Belê, azadîya cinîyan beşêk û katalîzorêk a azadîya heme beşanê komele ya etnîkî, cinsî, dînî, mezhebî û cematî ya.

Ma na hişmendî de yê ke, cinîya birêxistin, temînatê komela seypê û azad a; temînatê netewêka birexistin a. 

Ma sey cinîyê Kurd û Kurdistanî hem rastê hêrîşê dewletanê serweran yenê; hem zî binê zordarî û şîddetê camêrdanê keyeyanê ma, kargehanê ma, mehleyanê ma û heme warê cuyê ma de yê. 

Ewro no şero ke vera şarê ma yeno dayene, tira en zêde cinîyê Kurdan zerar vînenê. Cinîyê Kurd tutanê xo, dayîkanê xo, way û birayanê xo vindì kenî..  Nasnameyê înan o cinsî û netewî ser o şîdet her roj zêde beno.

Ma cinî veng danê ke, Bakurê Kurdistanî de şer vindero,  esasanê sîyasî û sivîlî ser o çareserkerdisê meseleya Kurd û Kurdistanî bêra qebûl kerdene û bi mixatab girewtişê heme partîyanê kurdan prosesê çareserîya sîyasî dest pêbika. 

Cinîyê Kurdan her wext bîyê hedefê dewletanê serweran. La cinîyanê Kurdan çi rey çok ronêna. Heme serewedaritiş û şerê Kurdan de cayê xo girewtê, mucadele dayê. Cunî hepisxaneyan de zî rastê îşkence, muameleyo xirab ameyî la çi rey gama xo peyser nêeştê. 

Tekoşînê Hafsa, Besê, Gulnaz, Zarîfe xaniman, Rewşen Bedirxan, Leyla Qasim, Zekiya Alkan û heme cinîyê ke tekoşînê netewî yê Kurdistanî de heta nika şehîd kewtê; têkoşînê heme xebatkaranê rayîrê azadîye de, têkoşînê ma yo. 

Tekoşînê her çar perçeyanê Kurdistanî yo ke seba azadî û xoserîye yeno dayene, tekoşînê ma yo. 

Biciwîyo têkoşînê cinîyanê Kurdistanî yo birexistinî yo seba seypêbîyayîşî, azadî, edalet û seba heqê bi statubîyayîşê Kurdistanî.”

08.03.2020 

Komîsyonê Cinî Jinan yê PAKî (Partîya Azadîya Kurdistanî)