Navenda Nûçeyan - 25 Parti û tevgerên Rojavayê Kurdistanê sîwanek bi navê, “Partîyên Yekitîya Niştimanî ya Kurd” ava kirin.

Cîhê balê ye ku Partîyên di nav ENKSyê de ne û Partîyên wek Partîya Pêşverû , El Wehde ne di nav vê tifaqê de ne.

Di derbarê erka vê sîwanê de daxuyanîya ku hate weşandin de hat gotin ku, “Dê bi navê "Partîyên Yekitîya Niştimanî ya Kurd" çalakîyên hevbeş werin lidarxistin da ku pêşketinên heyî yên derbarê yekitîya Kurd de bişopîne, desteyek dê nûnertîya van çalakîyan bike.”

Daxuyanî wiha ye:

"Ji ber rewşa hestyar a ku Sûrîya û herêm bi temamî tê re derbas dibe, ji ber giringîya hevdîtinên di navbera partîyên sîyasî û hêzên kurdî de û ji bo biserxistina destpêşxerîya Fermandarê Giştî yê Hêzên Sûrîyaya Demokratîk (QSD) a der barê yekrêzîya kurdan û yekkirina helwesta sîyasî ya kurdî li Rojavayê Kurdiatnê de, me partîyên sîyasî yên Rêveberîya Xweser a Demokratîk û hin partîyên li derveyî Rêveberîyê di 18.05.2020an de civînek li Qamişloyê li dar xist û ev biryar girtin:

- Li jêr navê "Partîyên Yekîtîya Niştimanî ya Kurd", em ê xebatên hevbeş bimeşînin û pêşveçûnên heyî yên der barê yekrêzîya kurdî de bişopînin ku karê şopandinê jî dê bikeve ser milên nûnertîyeke me ya nûavakirî.

- Me logoyek ji bo Partîyên Yekîtîya Niştimanî ya Kurd bijart.

- Wê bi berdewamî civînên nûnerên van Partîyan bên lidarxistin da ku nêrînên cuda yên der barê pêşveçûn û bûyerên nû de bên raberkirin û nîqaşkirin."

Partîyên Yekîtîya Niştimanî ya Kurd:

- Partîya Aştîya Demoqrat a Kurdistanê

- Partîya Yekîtîya Demokratîk (PYD)

- Kongreya Star

- Partîya Demoqrat a Kurdî ya Sûrî (P.D.K.S)

- Partîya Kesk a Kurdistanê

- Partîya Çep a Demokrat a Kurd li Sûrîyê

- Partîya Çep a Kurd li Sûrîyê

- Partîya Lîberal a Kurdistanê

- Partîya Biratî ya Kurdistanê (PBK)

- Partîya Niştimanî ya Kurdî li Sûrîyê

- Partîya Guhertina Demoqrat a Kurdistanê

- Tevgera Nûjen a Kurdistanê-Sûrîya - Partîya Têkoşîna Demokrat

- Partîya Azadî ya Kurdistanî ya Azad

-Partîya Yekîtîya Niştimanî ya Azad-Rojava

- Partîya Komarî ya Kurdistanî-Sûrîya

-Tevgera Çaksazîyê-Sûrîya

- Partîya Komunîst a Kurdistanê (KKP)

- Partîya Roj a Demokratîk li Sûrîyê

-Şepêla Pêşeroj a Kurdistanê - Partî Demuqratî Kurdistanî-Sûrî

- Yekîtîya Karkerên Kurdistanê (YKK)

- Partîya Kombûna Niştimanî ya Kurdistanî

- Partîya Rêkeftina Demokrat a Kurdî li Sûrîyê

- Partîya Demuqrat a Kurd li Sûrî (Partî)

ANHA