Înîsiyatîfê Weşangeranê Kurd waşt wa nuştox û weşangerê ke seba tehqîqatê derheqê KCDî de ameyê tepiştiş serbest bêrê veradayîş û astengîyê ke vernîya ziwan û kulturê Kurdan ser o yê bêrê wedaritene.

Înîsiyatîfê Weşangeranê Kurd derheqê tepişyayîşê nuştox û weşangerê kurd Azad, Zal, Nesrîn Navdar û Adil Qazî de beyanatêko nuştekî weşana. Înîsiyatifî beyanatê xo de eleqa ant polîtîkayanê serdest û zordestan û wina va: Kenê ke ziwan û kulturê kurdî çîne bikê, bi nê polîtîkayan wazîyeno ke, sazî û dezgehê kurdan bêrê krîmînalîzekerdiş. Zaf nuştox û weşangerî bi rastê tedayîya dewlete yenê. Ma baş zanê ke, astengkerdişê xebatê ziwanî û kulturî yê hetê serdestan ra her dem estbi û nika zî bi eynî hişmendî  wazîfeyê xo ser o yê."

Înîsiyatîfî beyanatê xo ard vîr ke mîyanê çend serranê peyênan de xeylê nuştoxî û weşangerî amê tepiştiş û derheqê înan de tehqîqatî ameyî akerdiş û kesê ke derheqê înan de tehqîqatî ameyê akerdiş û tewqîf bîyê wina rêz kerd.

“Feratê Dengizî, 10 serre cezaya hepisxaneyî ci rê birîya. Bahadîn Robar, 8 serre cezaya hepisxaneyî ci rê birîya.  Mîrza Ronî, 7 serrî cezaya hepisxaneyî ci rê birîya. Adil Başaran, 7 serrî cezaya hepisxaneyî ci rê birîya. Azad Zal (Mehmet Güngörmüş) ame tewqîfkerdiş. Nesrîn Navdar (Nesrîn Şanli) amey tewqîfkerdiş. Adil Qazî (Adil Ercan)  ame tewqîfkerdiş. Birahîm Xelîl Taş tepişîya û nika muhakeme beno. Mehmet Devîren ame tepiştiş û muhakeme beno. Subhî Îzol ame tepiştiş û muhakeme beno. Ayşe Kara (rojnameger) amey tepiştiş û muhakeme bena."

Weşanê ke mîyanê Înîsîyatîfê Weşangeranê Kurd de ca gênê  nê yê: Weşanên Ar, Aram, Aryen, Azad, Dara, Ekîn, J&J, Kurdistan, M, Morî, Na, Ronak, Rosana, Sîtav, Sor, Tevn û Wardoz.