Komeleyê Elewîyan ê Demokratîkî Dêrsim de têhetameyîşêkî Pîr û Dayîkan viraşte. Têhetameyîşêk 2 rojî dewam kerd. Hemserekê Komeleye Mûsa Kûlûyî va, “Ma tersenê vajê ma Elewî yê. La bawerîya ma rayîrê têkişte de cuyayîşî mojnayo ma. Ma do îqrar bîdê yewbînî û ma do bi waştiş paştî bidê yewbînî.”

Organîzasyon, bi deyîşanê Aşiq Hesen Yavûzî dest pêkerd. Dima Dayîka ocaxa Baba Mansûrî Fîdan Yildiz çira viste ta û badê zî Pîrê ocaxa Kureyşan Mûsa Çakmak û Pîrê ocaxa Axûçanî Îbrahîm Erdoganî gulbangî wendê. 

‘Cemxaneyî sey tîcaretxaneyêk yenê vînayîş’

Mûsa Kûlûyî va, “Nê welatî de 25 mîlyon Elewîyî cuwîyenê la hema zî camxaneyê înan sey tîcaretxaneyêk yene vînayîş. Ma wexto ke heqanê xo bi qanûnan bifînê xo dest û ma bawerîya xo her ca de bi serbestî bicuywîyê, ma o wext benê azad.”

‘Ma kelamê Heqî sey îbadetêkî vînenê’

Hemserekê Şubeya Komeleyê Elewîyan ê Demokratîkî yê Edeneyî Zeynel Keteyî va, “Bawerîya Raya Heqî de erd aîdê kesî nîyo, yê Heqî yo. Ma kelamê Heqî sey îbadetêkî vînenê. Ma do bawerîya xo nê wextanê xiraban de zî bicuwîyê û ma do timûtim a rêça bimbareke ra şorê.”

PÎRHA